Студент мутышто мыняр шонымаш… Школ капка гыч лекшылан тиде —ончыкылык илышышке вашталтышым пуртышо ӱшан, кугураклан — поро шарнымаш, кыдалаш профессийым налше, кӱшыл шинчымашым погышылан — тачысе кече, весела илыш.
Лаштыкнан тачысе унаже Параньга район Штрамарий почиҥга ялыште шочын-кушшо кидмастар Анжелла Бушкова.
Ӱдыр ончыч Йошкар-Оласе технологий колледжыште «Конструирований, моделирований да ургымо арверын технологийже», вара Марий кугыжаныш университетын Чумыр да профессионал образований факультетыштыже «Отрасль-влак почеш профессионал обучений: декоративно-прикладной искусство да дизайн» специальностьлам налын. Кок тунемме тӧнежшымат йошкар диплом дене тунем пытарен.
— Анжелика, тунеммаште тыгай аланым ойырен налаш мо таратен?
— Кид пашам йӧратем. Изи годсек тӱрым тӱрлем, ургем, пидам. Тидыжым мастарынрак ышташ кумыл лийын.
Шукерте огыл дипломым аралышым. Шымлымашем «Колледжыште декоративно-прикладной творчествым туныктымаште эстетике воспитаний» маналтеш. Выпускной квалификаций пашамлан лӱмынак ӱстембалшовычым ыштенам. Тушто марий орнаментым кучылтынам.
Умбакыже магистратурыш пураш шонем. Тидлан Юл кундем технологий университетым ойырен налынам.
Тыгак кызытсе жаплан келшыше спорт костюмым ургаш ательеш пашам ышташ пурынем. Йодмаш почеш тӱрлашат сай ыле.
— Студет пагытыште шарнымашеш поснак мо кодын?
— Колледжыште тунемме годым чӱчкыдын волонтёр сомылым шуктен шогенам. Савин ялыште верланыше йоча-пӧртыш коштынам.
Вургемым ыштыме дене кылдалтше тӱрлӧ конкурслаште вием тергенам.
МарГУ-што «Голос юности» икымше курсышто тунемше-влак кокласе фестиваль-конкурсын «Модо театр» номинацийышкыже ушненам. Тунам ӧрыктарыше материал гыч костюм-влакым ургымо да нуным ончаш темлыме.
Тыгак научный статьялам возенам. Ече дене таҥасымашке коштынам.
— Тугеже спорт дене кылым кучет?
— Тыге. Телым ече дене кошташ келша, кеҥежым куржталаш йӧратем. Школышто тунемме годым соревнованийлаш чӱчкыдынрак коштынам.
Икана, Медведево район Сенькан ялыште телымсе модмашыште мемнам пий поктен ыле. Тидыже писынрак тарванылаш таратен.
— Яра жапет кузе эртарет?
— Кевытышке пашам ышташ пураш ямдылалтам, тушко стажировкыш коштам. Тыгак сад-пакчаште лияш келша. По‰гым погаш йӧратем. Жапын колым кучем.
— Самырык тукымлан мом каласынет?
— Кызыт чылан телефонышто «шинчат». Шергакан жапым тыге пытарымешке, тудым кӱлеш семын кучылташ тыланем. Йӧратыза, пагалыза шкендам да йыр улшо лишыл еҥда-влакым.
О.МОШКИНА
