У коронавирус инфекцийын шарлымыжлан кӧра республикысе чыла гаяк аптекыште ик гана пайдаланаш лийме маске пытыш. Калыклан тиде вучыдымо лие, кузе тыге манын, ӧрын, вурседылашат тӧчыш, но вараже аралыше арверым марле, кулирке, ситце куэм гыч шкеак ургаш тӱҥале.
Лишыл жапыште сӱрет изишак вашталтшаш. Марий Элын Тазалыкым аралыме министерствыжын увертарымыж почеш, республикышкына Минпромторгын тыршымыж дене ик гана пайдаланаш лийме 82 тӱжем маскым кондымо. Тудым эн ончычак йодмашым пуышо организацийлашке колтат, вара веле аптекылашке луктыт.
М.ИВАНОВА
