«Рӱдӧ да Юл кундем Россеть Мариэнерго» филиал «Российысе эн сай электросеть» IX Россий конкурсышто сеҥыше-влак радамыш логалын.
Конкурсым «ЭнергоНьюс» интернет-портал эртарен. Жюри радамыш Россий Федерацийысе 19 регион гыч эксперт-влак пуреныт. Кодшо ийысе пашам иктешлыме негызеш 74 электросеть компанийым аклен ончалме.
Российысе эн сай электросетьлам куд номинаций почеш ойырымо: «Электровийым ӱшанлын пуэн шогымылан», «Энергийым пайдалын перегымылан», «Социально ответственный электросеть компаний», «Увер шотышто утларак почылтшо электросеть компаний», «Идалыкын инноваций проектше», «Идалыкын инвестиций проектше».
Тыгак потребительым эн шагал жаплан тул деч посна кодышо ТОП-10 да потребительлан электровийым эн ӱшанлын колтен шогышо эн кугу рейтинган ТОП-20 электросеть компанийым рашемдыме.
Жюри «Мариэнерго» филиалын кодшо ийысе пашажым кӱкшын аклен: «Энергийым пайдалын перегымылан» номинацийыште тудо кумшо верым налын. 0,4-110 киловольт куатан сетьлаште электровий йоммаш норматив почеш 9,44 процент наре шотлалтеш гын, мемнан филиална тудым 8,57 процент марте иземден кертын.
«Мариэнерго» тыгак потребительлан электровийым эн ӱшанлын колтен шогышо ТОП-20 электросеть компаний радамыш 0,79576579 ӱшанлык рейтинг дене пурен.
«Рӱдӧ да Юл кундем Россеть Мариэнергон» директоржо Дмитрий Федоров филиалын пашажым кӱкшын аклымылан тауштен да умбакыжат тыгак тыршен ышташ мутым пуэн.
Ю.ИСАКОВ.
