САМЫРЫК ТУКЫМ

  Марий ӱдыр лӱмеш

     Шукерте огыл «Мариечка» клип «ош тӱням ужын». Кум уста самырык еҥ Дмитрий Калягин, Дмитрий Погадав, Христина Александрова тыршымаш саскаштым марий ӱдыр-влаклан пӧлекленыт.

Ик Димаже мурым возен, режиссёр семын тыршен, весыже — тудым мурен. Марла кусарымаште кугу полышым Христина пуэн. Клипыште рольым провой кундем Эсмекплак ял гыч Оля ден Юля Батолинамыт модыныт. И.С.Палантай лӱмеш тӱвыра да сымыктыш колледжын студенше-влак Аида Иванова ден Вера Ямбулатова куштымаште мастарлыкыштым ончыктеныт.

Руш мурышто марий шомак-влак йоҥгат. Тыгай йӧн дене ты пашам тӱнямбал кумдыкышто шараш пайдале. Видео кызытсе саманлан келыштарыме. Кумдан палыме мурызо-влакын клипышт деч ок ойыртемалт. Видеошто тыглай мурымашым, куштымашым веле огыл, илышыште лийын кертше ик сӱретым ончыктен пуымо.

    Сюжет тыгай: кок самырык еҥ социал кыл гоч палыме лийыт. Рвезе тора Москва гыч ӱдыр деке лӱмын вашлиялташ толеш. Но Йошкар-Олаште йолташыжым вес каче дене вашлиеш. Ӱдыр вара ондален мо? Чыным пален налнеда гын, You Tube-ышко пурен, клипым ончыза. Тудо чынжымак ӧрыктарыше да оҥай.

О.МОШКИНА

Опубликовать в Одноклассники

Добавить комментарий