ЯЛОЗАНЛЫК

Марий Эл 44 медаль дене пӧртылын!

4 гыч 7 октябрь марте Москваште, ВДНХ кундемыште, эртыше «Шӧртньӧ шыже-2017» Всероссийский ялозанлык выставкым иктешлыме. 

Ончерыште паша лектышышт дене Российын 70 регионжо ден 15 эл палдареныт. Тушко чылаже 1400 утла предприятий ден организаций ушненыт. Ныл кече жапыште выставкым 300 тӱжем утла еҥ ончен. Марий Эл Республикын намийыме выставке стенд экспозицийыштыже регионысо агропромышленный комплексын кугу кӱкшытыш шушо да ончыкылыклан ӱшаным пуышо 20 утла предприятиятийын пашаже ончыкталтын.

Мемнан делегацийым Марий Эл Республик вуйлатыше Александр Евстифеев вуйлатен. Делегат-влак агробизнесфорумын, бизнес-форумын пашашкышт, «йыргешке ӱстелыш» ушненыт, научно-практический конференций ден семинарлаште, тыгак Кугыжаныш Кремль Дворецыште Ялозанлык да перерабатыватлыше промышленность пашаеҥ-влакын кечыштлан пӧлеклалтше торжественный погынымаште лийыныт.

Марий Элын тӱшка стендше дене палдарыме годым Российысе да йот элласе ятыр представитель деч вашкылым ышташ темлымаш пурен. Марий Элын Ялозанлык да продовольствий министерствыже дене Москвасе торговльо да услуго департамент, «Фуд Сити» опт-рознице кочкыш сату рӱдер, ялозанлык сатум ыштен налше-влакын региональный ассоциацийышт да «Поиск» агрофирме дене вашкылым ыштыме нерген ойпидышым подписатленыт.

«Вольык озанлык да племенной паша» павильонышто Российысе 100 утла агроозанлык, нунын коклаште Марий Эл гыч «Лукоз» СХП ООО паша лектышыштым ончыктеныт. Мемнан республик Зааненский урлык каза дене палдарен.

Конкурсын иктешлымашыж почеш, Марий Эл гыч мийыше предприятий ден организаций-влак тӱрлӧ номинацийыште ойыртемалтыныт.

«Чапле качестван кочкыш продукцийым ыштен налмылан» номинацийыште шӧртньӧ медаль дене палемдалтыныт:
— «Звениговский» ООО шыл комбинат: кӱктымӧ буженине, Казанковын шартанже, «Докторская» шолтымо колбаса, натуральный ӱмбалан шӧр сосиске, «Украинская» жаритлыме колбаса, «Шварцвальдская» пеле коптитлыме колбаса, «Московская» шолтымо-коптитлыме колбаса, тыгаяк «Сервелат» эн тамле лийыныт;
— «Сернурский сырзавод» ЗАО: «Камамбер», «Кроттен», «Качотта» сыр-влак, торыкан «Рикотта Прованс» сыр, «Ванильный Пломбир» торык, каза шӧр гыч ыштыме йоча-влаклан кочкаш келшыше «Козилакт» торык;
— «СОЛЮД» ООО: 2,5 % нугыдылыкан «Мариэльская бурёнка» Персик биойогурт, 2,5 % нугыдылыкан бифилайф,72,5 % нугыдылыкан ушкал ӱй, кукшо ӱйдымӧ шӧр;
— «Семеновский» племзавод ЗАО: «Комавел» сыр, «Марий Эл» кумыс, имне шӧр;
— «Йошкар-Ола хладокомбинат» ООО: вафле стаканыште 20 % нугыдылыкан фисташке «Пломбир ГОСТ» мороженый, вафле стаканыште 20 % нугыдылыкан турнявӧчыжан «Пломбир ГОСТ» мороженый;
— «Наще пиво» сырам шолтышо компаний ООО: Наше «Живое» сыра, Наше «Жигулевское» сыра;
— «Чай Руси» ООО: лышташан вуйдеҥге (Иван-чай) «Классический» чай; лышташан вуйдеҥге «Традиционный» чай, лышташан шерывӧчыжан вудеҥге чай;
— «Русь-Бейкери» ООО: Шале багет, чеснокан изи багет, томат да сыр дене фокаччо, Наполи чиабатта.
Ший медаль дене палемдалтыныт:
— «Яндар» ООО: «Крупнолистовой» вуйдеҥге чай, «Старинный Русский» вуйдеҥге чай, «Смородиновый» вуйдеҥге чай, «Брусничный» вуйдеҥге чай;
— «1-ше номеран кинде завод» ООО: «Легенда Мари» рудымо, кечшудо
кичкан уржа кинде;
— «Сувенир» фирме: емыж-саска кӧрган шоколад пряник;
— «Сернурский пищевик» ООО: В тӱшкашке пурышо (улитка) макарон
изделий.
Той медаль дене палемдалтыныт:
— «Сувенир» фирме: шинчалан «Булко» изделий;
— «Сернурский пищевик» ООО: томат соус.
Конкурсым иктешлыме почеш, «Сай урлык да ужалышаш вольыкым ончен куштымо пашам вияҥдымаште кугу кӱкшытыш шумылан» шӧртньӧ медальым «Лукоз» СХП ООО Зааненский урлык казаже сеҥен налын.

«Ял кундемым икшырымын вияҥдымаште кугу кӱкшытыш шумылан» ший медаль дене Медведево районысо «Руэм ял шотан илем» муниципал образованийын администрацийже да «Семеновский» племзавод ЗАО палемдалтыныт. Ты гана ялозанлык выставке гыч Марий Эл чылаже 44 медальым, тышеч 33 шӧртньӧ, 9 ший да 2 той медальым, конден. Сеҥыше-влакым уло кумылын саламлена!

Л.Камалетдинова.

Опубликовать в Одноклассники

Добавить комментарий