УВЕР ЙОГЫН

«Марий Эл»  газетлан – 105 ий

Марий Элын 100 ияш лӱмгечыжым пайремлыме идалыкыштак шочмо йылме дене лекше «Марий Эл» газетнам («Война увэр») савыкташ тӱҥалмылан 4 февральыште 105 ий темеш.

Тудо тӱрлӧ йыжыҥым эртен, лӱмжымат вашталтылын, лудшыжат шукемын я шагалемын. Марла лекше газетна ынде икмыняр ий интернет кумдыкыштат вержым муын. Редакций вий денак «Сурт-пече» газетымат савыктена. Тылеч посна марий калыкнан, кундемнан историйже, культуржо, йӱлаж дене кылдалтше ятыр книгам ямдылена. Нуным редакцийышкат толын але почто гочат налаш лиеш.

Пагалыме йолташ-влак, лӱмгече идалыкым шотыш налын,  «Марий Эл» газет редакций икмыняр акцийыш ушнаш ӱжеш.

  1. Школлан, книгагудылан – газет подписке.

Шочмо кундемыштыда илыше калыклан, вер-шӧрдам аралыше пошкудылан, школышто тунемше-влаклан але илалше-влакын пӧртышкышт «Марий Эл» ден «Сурт-пече» газет-влаклан подпискым ыштен пуаш темлена. Тидым те, почтыш кайыде, интернет гоч «Подписка онлайн» (https://podpiska.pochta.ru/) адресыш пурен ыштен кертыда. Мутлан, «Марий Эл» газетым ойырен налыда да подпискым кӧлан, мыняр тылзылан ыштышашым да могай адрес колтышашым возеда. Оксам банк карте гоч тӱлыман. Тыге газетлан моткочак писын да куштылгын возалташ да вучыдымо пӧлекым ышташ лиеш.

  1. 105 ийлан – 105 книга.

Районласе библиотекылашке пытартыш ийлаште савыкталтше марий книга-шамычым пӧлеклыме акцийыш ушнаш ӱжына. Книга-влакым (тӱрыс списке — шкенан сайтыште http://газетамарийэл.рф/) да социальный сетьысе (https://vk.com/gazeta_mari_el) лаштыкыште) «Марий Эл» газет редакцийышкат толын налын аде почто дене заказым ыштен кертыда. Мутлан,  Г.Калитовын «Черемис пикшын умдыжо», В.Колумбын «Ойырен налме ойпого», В.Громовын «Сколько у марийцев родственников», О.Герасимовын «Четлыкысе муро» книгашт да молат.

Нине акцийлаш эн ончычак «Марий Эл» газетын коллектившат ушна.

Мутлан, ик палыме драматург пытартыш жапыште савыкталтше марий книга-влакым шочмо школжылан пӧлеклен. А Йошкар-Олаште илыше ик марий ӱдырамаш илалше да инвалид-влаклан «Сосновая роща» интернат-пӧртлан ынде икмыняр гана газетлан подпискым ыштен пуэн. Палена, поро пашам шуктышо-влак тендан коклаштат шагалын огытыл. Черетан акцийыш землячествын еҥже, мер актив, лӱмлӧ марий, амалкалче-влак кумылын ушнат манын ӱшанена.

Акцийыш ушнышо-влак шкендан нерген увертараш (социальный сетьысе группо гоч але 49-55-11 №-ан телефон дене) ида мондо.

РЕДАКТОРАТ

Опубликовать в Одноклассники

Добавить комментарий