Юл кундем федеральный округысо регионлаште 2018 ий кеҥежымсе тазалыкым пеҥгыдемдыме кампанийым иктешленыт.
20 сентябрьыште Россий президентын Юл кундем федеральный округышто полномочный представительжын алмаштышыже Олег Машковцев ПФО-што кеҥеж оздоровительный кампанийым иктешлыме йодыш шотышто окружной совещанийым эртарен.
Республик деч Марий Элыште тӱҥ федеральный инспектор Петр Журавлев, республикысе правительстве председательын икымше алмаштышыже Михаил Васютин, Марий Элын образований да науко министрже Наталья Адамова да Россий МЧС-ын Марий Элысе Тӱҥ управлений начальникшын пашажым шуктышо Алексей Сабадырев лийыныт.
ПФО-што кеҥеж жапыште 13 тӱжем утла йоча каныме организаций пашам ыштен. Тушто 1,7 млн. наре икшыве тазалыкшым пеҥгыдемден. Нунын кокла гыч 420 утла тӱжемже – шуко шочшан, окса шотышто чӱдын илыше ешла гыч да неле илыш ситуацийыште улшо ӱдыр-рвезе-влак. Юл кундем федеральный округ деч ӧрдыжтӧ, тидын годымак Крым Республикыште, путевко дене 44 тӱжем наре икшыве канен. Тидыже ӱмашсе деч 31 процентлан шукырак.
Марий Элыште кеҥежым тазалыкым пеҥгыдемдыме 193 учреждений пашам ыштен. Чылаже тушто 19,5 тӱжем наре йоча лийын. Нунын кокла гыч 8,7 тӱжемже – неле илыш ситуацийыште улшо икшыве-влак. Республик деч ӧрдыжкӧ каналташ да тазалыкым пеҥгыдемдаш тӱжем утла ӱдыр-рвезе миен толын. Нунын кокла гыч 195 икшыве Шем да Азов теҥыз серышлаште лийыныт.
Кеҥеж каныш жапыште ийготыш шудымо-влакын правонарушенийым ыштыме да перныл коштмо шотышто профилактикылан кугу тӱткыш ойыралтын. Тений 14 гыч 18 ияш марте ийготан 100 тӱжем наре ӱдыр-рвезым, нунын коклаштак ийготыш шудымо-влакын пашашт шотышто комиссийлаште учетышто шогышо-влакат лийыныт, ик жаплан пашаш пуртеныт. Марий Эл Республикын калыклан пашам ситарыме рӱдерышкыже кеҥежым 433 подростко миен.
Полпредын алмаштышыже сай семын йоча-шамычын каныме верлаштышт чрезвычайный ситуаций лийдымым палемден.
Л.Камалетдинова.
