Марий Эл Республикын социальный вияҥмаш министрже Ольга Фёдорован правительствын черетан совещанийыштыже ойлымыж почеш, регионышто илыше граждан-влаклан палемдыме чыла социальный гарантийым тений икымше кварталыште тӱрыснек арален кодымо да тылзе еда тичмашнек шуктымо.
«Пеш сай, – палемден регионым вуйлатыше Александр Евстифеев. – 2016 ийысе гай кумшо йочалан пособийым тӱлаш чарныме огыл».
Сеҥымаш кече марте жап шукак огыл кодмым ушештарен, А.Евстифеев ведомство вуйлатыше деч тыгак ветеран-влак дене кылдалтше пашан кузе шукталтмыж нерген йодыштын.
«9 майлан тӱткыш деч посна ик ветеранат ок код. Чаманен палемдыман, нуно ий еда шагалемыт. Но Сеҥымаш кечын веле огыл, тугакшат ветеран-влак тӱткыш деч посна огыт иле. Социальный аралымаш чумыр системе кажныжлан посна виктаралтын», – рашемден О. Фёдорова.
Ветеран-шамычлан медицине полышым пуымо, нуным тергыме нерген республикын тазалыкым аралыме министрже Марина Панькова каласкален. Тыгодым тудо илалше-влаклан диспансеризацийым жапыштыже эртарымым ойырен палемден. Таче кечылан Кугу Отечественный сарын диспансеризацийым эртышаш 1097 ветеранже гыч 1091 гражданиным ончымо. Утларак ужашыж деке мӧҥгышкӧ лекме.
«Сарын ветеранже-влакын госпитальыштышт кодшо ий гыч гериатрический полышым пуымо 30 койкан отделений пашам ышта. Тымарте пашам ыштен кертше кугу ийготан 937 еҥым эмлыме. Уло республикылан ситышт манын, тений эше ныл гериатрым ямдыленна, да Курыкмарий районышто эше икмыняр койкым ямдылаш палемденна», рашемден министр.
Тазалыкым аралыме министр тидымат палемден: Йошкар-Оласе медицине колледжыште илалше-влакым тичмашын ончышо медсестра-шамычым ямдылаш тӱҥалме.
Совещанийыште гериатрический службым, профильный специалист-шамычым ямдылен, эшеат вияҥдаш кутырен келшыме.
Марий Эл Республик вуйлатышын организаций-аналитике виктемжын уверже негызеш М.ИВАНОВА ямдылен.
