Марий Эл вуйлатыше Александр Евстифеев паша дене Волжскыш миен, палдара Марий Эл Республик вуйлатышын организаций да аналитике виктемже.
Эн ончыч тудо «Горгаз» микроранышто лийын. Тусо Шестаков уремыште «Тачысе илышлан келшен толшо ола кумдыкым тӱзатымаш» программе дене келшышын шотыш кондымо кудывечым ончен савырнен. Тиде пашалан 4,5 миллион наре тенге ойыралтын. Но мом кузе ыштыме республик вуйлатышылан тӱрыс келшен манаш огеш лий.
— Оксам ойырымо, но мӱй печкешке совла тегытым ешарыме семын лектын. Асфальтым шарыме, тротуарым, корным ыштыме. Чыла сай. Но вет газонжымат ыштыман, — каласен вуйлатыше.
Александр Евстифеев верысе калык дене мутланен да олан администрацийжылан ситыдымашым кораҥдаш кӱштен.
Тылеч вара Волжск оласе ик эн тӱҥ объект – спорткомплекс – дене кылдалтше йодышым каҥашеныт. 50 наре ий жапыште тыште косметический ремонт веле ышталтын. А кызыт федеральный да Россий президентын резерв фондшо гыч ойырымо окса кӱшеш спорт полатым да стадионым капитально олмыктат. Тиде паша кузе кайымым ончен савырнымеке, шагал огыл йодыш лектын. Александр Евстифеев чылажымат келшен толшын ышташ кӱштен.
Умбакыже Марий Эл вуйлатыше Чодыра пашаеҥ-влакын кечыштлан да Марбумкомбинатым ыштымылан 84 ий теммылан пӧлеклалтше торжественный мероприятийыште лийын. Александр Евстифеев тушто палемден: тиде – эн сай кагаз комбинат. Тудым вуйлатыше-влак предприятийымат вияҥдат, ыштен налме оксашт гыч кугу ужашыжым пӱртӱсым аралыме пашаланат кучылтыт.
— Комбинатыште тӱлымӧ пашадар республикысе кокла пашадар деч лач кок пачаш кугу. Тыште шке йӱлашт уло, олам, самырык ден ветеран-шамычым пагалымаш палдырна. Тиде предприятийыште ончыч да кызыт тыршыше-влакым мый паша верым да профессийым чын ойырен налме дене уло кумылын саламлем, — каласен Александр Евстифеев.
Пайрем вашлиймаш мучаште Марий Эл вуйлатыше ойыртемалтше пашаеҥ-влаклан тӱрлӧ кӱкшытан наградым кучыктен.
Официальный ужаш деч вара республик вуйлатыше предприятийын производствыжым ончен коштын. Тачысе кечылан тыште кагаз ден картоным ыштыше кум цех, теплоэлектроцентраль да икмыняр моло цех улыт. Комбинатын шуктымо пашаже Марий Эллан целлюлоз-кагаз продукций дене экспортер-влак радамыш да ончыл регион-влак коклашке пураш йӧным ышта.
Чыла продукций гыч 30 процентше вес эллашке колталтеш. Мутлан, целлюлоз – Китайыш, Казахстаныш, Чехийыш, Болгарийыш. Картон – эрвел Европыш, упаковатлаш кучылтмо кагаз – Ираныш, Египетыш, Израильыш.
— Марбумкомбинат внешнеэкономический пашамат шукта. Тыгай предприятийже республикыште шукыжак огыл. Тыгак тиде — налогым тӱлымӧ шотышто сай предпряитий, — каласен регион вуйлатыше. Тыгодым ӱмашсе дене таҥастарымаште тений комбинатыште продукцийым шым процентлан шукырак ыштен лукташ тӱҥалмымат палемден коден.
Марий целлюлоз-кагаз комбинатын генеральный директоржо дене мутланыме годым предприятийым эшеат вияҥдышаш нерген ойленыт. Александр Сташкевичын палдарымыж почеш, ӱмаште гына пыштыме инвестицийын кугытшо 711 миллион теҥгешке шуын. Кок ий жапыште тыште кугу концентрациян бакым чоҥаш тӱҥалыныт. Тудо целлюлоз … аралаш ышталтеш. Тыгак эрыктыше у сооружений-влак чоҥалтыт, отходым йӱлалтыме котельньым пашаш колташ ямдылалтыт.
Л.Камалетдинова.
