Пытартыш жапыште марий тӱран вургемым чиен коштшо-влак шукемыныт манам гын, нимынярат йоҥылыш ой лий, шонем. Тидыже, мутат уке, марий чонан кажне еҥым куандара, кугешныме кумылым шочыкта. Приволжский посёлко гыч Евгения Кошкина кызытсе, кажне кечын чиен коштмо вургемым, тӱрлӧ арверым марий тӱр, тамга дене сылнештара, эсогыл джемперже-влакымат марий узор дене пидеш.
Кидпашалан Евгения Йошкар-Олаште, Национальный президент школышто тунеммыж годым тунемын. Ты пашалан туныктышыжо … Орлова шӱмаҥден.
— Сӱретлашат моткоч йӧратем, но ала-молан пу гыч тӱрлӧ фигурым пӱчкеден лукташ тунеммем шуын. Сандене школ деч вара Волжскысо нылымше номеран училищыш плотник-столярлан тунемаш пуренам, — палдара моткочак поро кумылан, кече гай шыргыжше ӱдыр. — Кум ий тушто тунеммеке, Озаҥыш кудалынам, тусо тухникумыш коваште вургем шотышто художник-модельерлан пуренам. Экзаменым эрташ йӧсӧ ыле, ик верлан — 25 еҥ.
Но тудым ӱдыр тӱрлӧ амаллан кӧра тунем лектын кертын огыл: Волжскысо целлюлоз-кагаз техникумыш куснен.
Кажне кечын чиен коштмо вургемыш тамгам ыштылаш кидпашалан шӱман ӱдыр иктаж кум ий ончыч тӱҥалын. Эн ончычак тудо джинс курткыжым сылнештарен. Варажым тудын деке йодын толшо-влак шукемыныт, сандене эркын-эркын моло арверышкат куснен. Таче марте мом гына тудо сӧрастарен огыл! Сумкалан, тувырлан, кӱпчыкваллан, матрёшкылан веле огыл, тӱрлӧ шкатулкылан, кухньышто пӱчкедаш кучылталтше оҥа-влаклан марий тӱсым пурта.
Тиддеч посна Евгения джемперым пидме годым марий узорым ыштен, оҥго почеш оҥгым луктеда. Спице денат, крючок денат пидаш мастар.
— Изиэм годым авамын пидмыжым ужынам да мыят тидлан кумылаҥынам, — манеш тудо.
Ыштыме кидпашажым ончет да, ӧрат. Кузе тудо чылажымат шукта? Тидын шотышто шкеже тыгерак ойла:
— Кидем ярсыме годым эре пидам. Мӧҥгыштат, пашаштат, эсогыл автобус дене кудалме годымат. Тиде паша мыйым куандара, у шӱлышым пуа, шонымашыш шуаш тарата.
Е.Кошкинан кидпашажым йодын толшо-влак Удмуртий, Германий, Израиль, Америке, Австралий да Российын ятыр олаж гыч лийыныт.
Чолга ӱдыр шке пашажым тӱрлӧ конкурсыш аклаш луктеш.
Кумданрак — «Марий Эл» газетын
16 сентябрьыште лекше номерыштыже лудын кертыда.
Алевтина Байкова.
(Фотом Е.Кошкинан альбомжо гыч налме.)
