Марий Турек посёлкышто Ший ийготын школжо шукертсек пашам ышта. Кодшо кечылаште тушко коштшо-влак адакат пеш оҥай занятийыш погыненыт.
Район администраций вуйлатышым алмаштыше И.Новикова «Комфортан оласе средам формироватлымаш» программе дене палдарен. Марий Турек районысо рӱдӧ эмлымверын врач-терапевтше Ж.Иванова «Остеопороз – XXI курымын йылмыдыме эпидемийже» презентацийым ыштен, остеопороз профилактике шотышто анкетированийым эртарен, тиде чер дене орланыме годым лачшымак мом кочкаш кӱлмӧ дене палдарыше брошюр-влакым пуэден. А «Орифлейм» команийын моторлык экспертше Д.Емелькина оҥай-мастер-классым ончыктен. «Знамя» газет редакцийын тӱҥ редакторжо Л.Меркушева «Ветеранын озанлыкше» фотоконкурсым иктешлен, сеҥыше-шамычым палемден.
М.ИВАНОВА.
