10 декабрьыште Марий тиште кечым палемдаш тӱҥалына. Тудлан пӧлеклалтше тӱҥ мероприятий-влак республикысе Мер-политике рӱдерыште эртат. Тиде кечын 1775 ийыште Санкт-Петербург олаште «Сочинения, принадлежащие к грамматике черемисского языка» икымше марий книга лектын. 1998 ий гыч Тиште кече кугыжаныш кӱкшытан пайремыш савырнен. Мо вара мемнам вуча?
3 декабрьыште «Живопись — марий калыкын тӱвыражын ужашыже» сӱретче-влакын ончерышт почылтеш.
6 декабрьыште «Марла чын возена» 7-ше тӱшка диктантыш марий йылмым палыше кажне еҥ ушнен кертеш. Тудо Марий кугыжаныш университетын тунемме да лабораторий корпусыштыжо эрта.
10 декабрьыште Марий тӱвыра форум лиеш. Мер-политику рӱдерыште эр гыч кас марте тӱрлӧ мероприятий эртат. Калык усталык сату ончер, фотоончер, марий кочкыш, марий тӱвыран эртыше да кызытсе йыжыҥжым почын пуат. Ты пайремын унаже-влак варажым мастар-класслаш куснат. Тушто нуным марий сӧрастарышым, курчак аралтышым, финн тарелкам ышташ, марий тӱрым тӱрлаш туныктат. А «Марла чын возена» мастар-класс марий йылмын чеверлыкшым почеш. «Книга памаш» ончер у марий книга-влак дене палдара.
Форумын туныктымо ужашыште профессор Любовь Абукаева «Йылмыште — калыкын чонжо, илыш умылымашыже да койыш-шоктышыжо» да «Калык ончылно чолган кутыро» лекций-влакым лудеш. Марий Эл Республикын шочмо йылмым туныктышо-влакын ассоциацийыштын кумдаҥдыме заседанийже лиеш. «Йыргешке ӱстел» годым марий лексикографийын вияҥме корныжым лончылат. «Электрон увер аҥаште — марий йылме да тӱвыра» вашмутланымаш эрта.
Марий тӱвыран вияҥмыже да ончыкылыкшо нерген мутланымашлан посна «йыргешке ӱстел» полеклалтеш. «Марий куштымашын юзо вийже», «Марий муро» усталык лабораторий-влак эртат. Сылнымутым йӧратыше-влакым поэзий унагудо вуча.
Кугыеҥ-влак коклаште «Мунло» уш-акыл марафон тений кумшо гана эрта, районла да Йошкар-Ола гыч команде-влакым чумыра.
Йоча-влаклан посна мероприятий-влакым палемдыме. Нуным «Уштодыш модыш», «Театр да йоча» театр унагудо вучат, тыгак мастар-класслаште шинчымашыштым да кид лывыргылыкыштым пеҥгыдемден кертыт.
Марий тиште кече кугу концерт дене мучашлалтеш.
Пайремым эртарымашке Марий Элын Тӱвыра, савыктыш да калык паша шотышто,Образований да науко да министерствыже-влак, Республикысе марий тӱвыра рӱдер, Мер-политике рӱдер, Марий кугыжаныш университет, И.С.Палантай лӱмеш республикысе тӱвыра да сымыктыш колледж, Мер Каҥаш, Российысе марий-влакын федерал калыкле-тӱвыра автономийышт ушненыт.
Раисия Николаева.
