26 апрельыште Марий Талешке кечым палемдена. Ты пайрем XVI курымышто илыше Полтыш луман марий онын шочмо кундемжын, калыкшын эрыкышт верч чоткыдын шогымыж дене кылдалтын ты пайрем. Тидын верч тудо шке вуйжым пыштен. Эн ончыч ты пайрем 1917 ийыште лийын. Угыч тудым калыкнан национальный талешкын кечыже семын 1990 ийыште палемдаш тӱҥалме.
Ты кече вашеш республикысе Марий тӱвыра рӱдер Тӱвыра, печать да калык-влакын пашашт шотышто, Науко да образований министерстве дене пырля марий талешке-влак нерген творческий паша конкурсым увертарен. Тудо «Нуно икымше лийыныт» маналтеш да I марий калык погынышто участвоватлыше марий ӱдырамаш-влаклан пӧлеклалтеш. Вет Ӱпӧ губернийын Пӱрӧ олаштыже эртыше ты погынлан 1000 ий темеш.
Конкурс самырык-влакым шочмо элым йӧратыме шӱлышеш шуарыме пашаште у йӧн ден технологий-влакым кучылтмо дене кылдалтын. Тудо калыкнан историйже гыч сай пример-влак негызеш ӱдыр-рвезе-влакын ушышкышт, чонышкышт, илыш умылымашкышт шке калыкын чын патриотшо улмо шонымашым шыҥдараш полшышаш.
Фестивальыш самырык-влакын мер организацийышт, школ, вуз ден суз тунемше-влак ушнен кертыт. Презентаций паша-влакым кум номинацийыште аклаш тӱҥалыт: эн сай технический дизайн; эн сай творческий паша; ойыртемалтше выступлений.
Йодмашым 25 апрель марте тыгай адрес дене колтыман: Йошкар-Ола, Первомайский урем, 109-ше №-ан пӧрт. Тел./факс: (8362) 45-88-51. Электрон почто: mari-centr@mail.ru. Контактный лица — Николаева Раисия Петровна, тел. 45-88-51.
С.Носова
