15 майыште Москосо Новодевичий шӱгарлаште лӱмлӧ семмастар Андрей Яковлевич Эшпайын шӱгар ӱмбалныже тудлан памятникым почыныт. А.Я.Эшпай — СССР-н калык артистше, Ленин премийын лауреатше, СССР кугыжаныш премийын лауреатше, СССР Композитор ушемын членже. Тудо мемнан землякна, МАССР искусствын сулло деятельже Яков Эшпайын эргыже. Андрей Яковлевич Кугу Отечественный сарын участникшат лийын. Тудо раздведке взводым вуйлатен, Йошкар шӱдыр орден дене палемдалтын. Тыныс илышыште тудо мыланна шуко сылне деч сылне музыкальный произведенийым пӧлеклен. Лишыл еҥже-влак тудлан шочмо кечынже шӱгар умбакыже моткоч ойыртемалтше шарныктышым вераҥденыт.
Тиде кечылаште Марий Эл Кугыжаныш Погын президиумын заседанийже эртен. Туштат Андрей Эшпайын лӱмжым чапландараш шонымаш дене Йошкар-Оласе ик скверлан пуаш пунчалыныт. Тидлан амалжат уло. Вет семмастар марий рӱдолан гимнжын ик авторжо. А тиде скверже Машиностроитель урем деч касвелкыла верланен, Красноармейский урем деч Свердлов урем марте шуйна. Туштак варажым памятникым шогалтышаш улыт да тудым торжественно почаш палемдыме.
С.Носова
Снимкыште: А.Я.Эшпайлан памятник.
