23 декабрьыште Национальный президент искусство школ пеленысе Чумыр марий йоча духовой оркестрын участникше-влак Кремль полатыште мастарлыкым ончыктеныт.
Музыкант-шамыч концерт программыштым, музыкальный произведенийышт-влакым, ик верыште шинчышыла огыл, а тӱрлӧ двийженийым ыштен шоктеныт. Тыге оркестр ойырен налме турым эртен. Тудыжым Валерий Халилов лӱмеш духовой оркестр да духовой ден ударный семӱзгарым шоктышо-влакын «Духовой общество» ассоциацийышт РФ правительстве председательын алмаштышыже Ольга Голодецын темлымыж почеш эртарен. Музыкант-влак Россий кугыжаныш Советын еҥже-влак ончылно мастарлыкым ончыктеныт. Чумыр марий йоча духовой оркестр деч посна тыгак Москва, Белгород, Владимир областьла гыч музыкальный коллектив-влак лийыныт.
Кажныже лу утла произведенийым шоктен ончыктен, а мучашлан, иктеш чумырген, «Прощание Славянки» мурым шоктеныт.
— Ончаш погынышо-влак кажныжым шокшын вашлийыныт, кужу жап совым кыреныт, — палемда Чумыр марий йоча духовой оркестр вуйлатыше Людмила Майкова. — Мемнан ӱдыр-рвезе-влакат чылалан келшеныт, эсогыл «Духовой общество» ассоциацийын президентше Михаил Брызгалов кӱкшын аклен ойлен. Йоча-шамычлан Кремльыште выступатлаш веле огыл, Москошто лияш да тусо моторлыкым ончен кошташ пеш келшен.
А.БАЙКОВА
