УВЕР ЙОГЫН

Мардеж кум меҥгым йӧртен

Тӱтан мардеж республикыштына Курыкмарий район Катраси – Йоласал электролинийыште кум меҥгым йӧртен да Козьмодемьянск олаште илыше-влакым электротул деч посна коден.

Электромеҥге-влак шуҥгалтме верыште 20 энергетик да 14 единице спецтехнике пашам ыштеныт. Линийым тӧрлатыме жапыште 55 еҥым да 30 единице техникым ушен шогышо 16 бригаде Козьмодемьянскыш социально кӱлешан объект-влаклан – район больницыш, эрыктыше сооруженийыш да вӱд тулышо станцийыш — ешартыш источниклам конден. Тидлан чылаже 3,275 мегаватт куатан 79 ешартыш источникым кучылтмо.

«Рӱдӧ да Юл кундем Россеть Мариэнергон» энергетикше-влак аварийын эҥгекшым кораҥдыме пашам, йӱр ден виян мардежым ончыде, йӱд мучко шуктеныт. Нунылан полшаш тыгак «Рӱдӧ да Юл кундем Россеть Нижновэнерго» да «Чувашэнерго» гыч коллеге-влак толыныт.

Курыкмарий районысо электросетьлаште аварийын эҥгекшым кораҥдыме, электромеҥгылам шогалтыме. Филиал ончычсо гаяк режимыште пашам ышта.

Палемдаш уто огыл, электровий йӧрталтме да энергообъектлаште эҥгек лийме нерген «Рӱдӧ да Юл кундем Россетьын» контакт-рӱдерышкыже кече мучко яра ыштыше 8-800-50-50-115 телефон дене але светлаястрана.рф порталыш увертараш лиеш.

Ю.ИСАКОВ

Опубликовать в Одноклассники

Добавить комментарий