СОЦИАЛ ИЛЫШ

Марафон: Данил Плужников – Йошкар-Олаште

12-16 январьыште Марий Эл да Чуваш республиклаште Регион-влак кокласе «Полшаш жап — 2018» Рошто концерт марафон эртен. Тудын тӱҥ унаже «Голос. Дети -3» шоушто сеҥыше Данил Плужников лийын. 

Марафон 12 январьыште Республикысе йоча клинический эмлымверын актовый залыштыже черле йоча-шамычлан поро кумыл концертым ончыктымо дене тӱҥалын. Изи пациент-влак Чебоксар гыч мурызо студент-влак Ульяна Самохина ден Олеся Захаровам, марафонын самырык участникше-шамыч Александр Долинский ден Жанна Аришевам, фокусник-иллюзионист Альберт Пластининым, чыла еҥын кумылжым налын моштышо артист Егор Матвеевскийым, «Артикль» пӧръеҥ ансамбльым шокшын вашлийыныт. Поснак Сочи гыч толшо Данил Плужниковлан чот куаненыт.  

«Пагалыме уна-влак, тендан выступленийда черле йоча-влакын кумылыштым палынак нӧлтале да писынрак тӧрланаш вийым, ӱшаным ешарыш, сандене ме чылаландат уло чон дене тауштена», – артист-влаклан мане эмлымверын тӱҥ врачше Татьяна Бастракова. Рошто концерт марафонын участникше-влаклан Марий Эл правительстве председательын икымше алмаштышыже Илга Дравниеце ден тазалыкым аралыме министрын алмаштышыже Ангелина Ушаковат кумылын тауштеныт.

14 шагатлан поро кумыл акцийын участникше-шамыч преподобный Сергий Радонежскийын православный гимназийышкыже миеныт. Уна-влакым тӧнежын директоржо, ПГТУ пеленсе святой орланыше Татианан храмжын настоятельже Евгений Сурков вашлийын. Гимназийын тунемшыже-влак ден «Благовест» архиерей хор Рошто пайремлан пӧлеклалтше изирак концертым ончыктеныт. Вара мутым Данил Плужниковлан пуэныт. Тудо йоча-влакын шуко-шуко йодышыштлан вашештен.

А 18 шагатлан Сеҥымашын XXX идалыкше лӱмеш тӱвыра полатыште начарын куснылшо да коштын кертдыме йоча-влаклан полшымо шотан кугу Рошто концерт лийын. Калык кажне артистым совым рӱж кырен вашлийын-ужатен, поснак – Данил Плужниковым. Тудо эртыше пайрем-влак дене шокшын саламлен да келге шонымашан мурыжо-влакым чонжо вошт колтен мурен.

«Полшаш жап» фондым вуйлатыше Александр Ефимовын мутшо почеш, тыгай сынан кодшо концерт годым Марий Элыште илыше Дарья Тимофеевалан инвалид коляскым налаш оксам погымо нерген увертарыме улмаш. Поро чонан да кумылан еҥ-влакын полшымышт дене шергакан тиде пӧлекым Дарья ден аважлан кучыктымо.

Марий Эл Республикыште икшывын праваж шотышто уполномоченныйын полышкалышыже Ирина Иванова концертын организаторжо-влаклан тау мутым ойлен да тыгай сынан мероприятийым лишыл еҥ-шамычлан полшымо проектын тӱҥалтышыже семын аклен.

М.ИВАНОВА.

Опубликовать в Одноклассники

Добавить комментарий