24 сентябрьыште М.Шкетан лӱмеш Марий национальный драме театр у тургымжым почеш. Тиде кечынак Финн-угор театр-влакын XIII фестивальышт тӱҥалеш.
У тургым могай спектакль-влаклан поян? Фестиваль кузерак эрташ тӱҥалеш? Нине да моло нерген журналист-влаклан кодшо арня мучаште эртаралтше пресс-конференцийыште театрын вуйлатышыже Эрик Юзыкайн, художественный вуйлатышыже Василий Пектеев да режиссёр Роман Алексеев каласкалышт.
Театр у тургымжым да «Майатул» фестивальым «Окса тул» спектакль дене почеш.
– Йодмаш ты гана моткоч шуко пурен ыле, но коронавирус инфекций шарлымылан кӧра йот кундемла гыч театр коллектив-влак огыт тол, сандене Эстоний, тыгак Хант-Мансий округ гыч театр-влак спектакльыштын видеоверсийыштым колтеныт, — палемден Эрик Юзыкайн.
Фестиваль жапыште чылаже 12 спектакль ончыкталтеш.
– «Майатулышто» сеҥыше-влакым молгунамсе семынак тӱрлӧ номинацийыште палемдена, — рашемдыш Василий Александрович. — Фестивальыште эн сай спектакльлан тӱҥ призым сеҥен налшылан «Майатулын» статуэткыжым кучыктена. Тудым лӱмынак Сергей Яндубаев ямдыла.
«Майатул» «Йыван Кырла. Путёвка в жизнь» спектакль дене мучашлалтеш. Тиде постановкым шукерте огыл М.Шкетан лӱмеш театр Мосошто самырык режиссер-влакын «Артмиграций» VIII фестивальыштышт ончыктен. Тушко шӱдӧ наре йодмаш пурен. Тушечын эн сай 8 спектакльым ойырен налыныт. Нунын коклашке мемнан театрнат логалын. Марий артист-влак А.С.Пушкин лӱмеш драме театрын сценыштыже модыныт. Э.Юзыкайнын ойлымыж почеш, ончышо да фестивальын критикше-влак спектакльым кӱкшын акленыт.
У тургым тӱҥалмекак, театр сценыш икмыняр у спектакльым луктеш. Тиде — «Еҥ марий — вот марий», «Ава капитал», «Пампалче», «Короткий день».
«Ава капитал» спектакльым самырык драматург Володя Матвеевын пьесыж почеш шындыме. Автор кугурак ӱдыржын шочмыж годым азам ыштыме пӧртыштӧ лийын. Тушто мом ужмо-колмыжым, роддом нерген калыкыште шарлыше историй-влакым иквереш чумырен.
«Пампалче» мюзиклым сценыш лукмаште режиссёр Роман Алексеев тырша. Сценарийым Зинаида Долгова, а мурылан текстым поэт Зоя Дудина возеныт, семым самодеятельный композитор Светлана Яндукова келыштара.
«Азбука театра» спектакльынат репетицийже тӱҥалын. Тудын режиссёржо – С.Пектеев. Спектакль калык йомак, легенде-влак негызеш ямдылалтеш.
С.Васинын шындыме (шкеак сценарийым возен) «Короткий день» спектакльым наркотик ваштареш кучедалме темылан пӧлеклыме. Самырык еҥын тазыла корныш моткоч вашке шогалын кертмыж нерген артист-влак эше ик гана шижтарен ойлат. Тушечын мӧҥгеш лекташыже веле неле але йӧршешат ок лий. Тиде пашам ӱдыр-рвезе-влак ден нунын ача-аваштлан ончаш пайдале.
У ий деч вара театрыште «Гамлет» (У.Шекспир), «Кӱдырчан ӱжара» (К.Коршунов) да моло спектакль-влакымат калык ончыко лукташ палемденыт.
— Театрын кудымшо пачашыштыже эше ик площадкым почынна. Тудым «Цех-зал» манын лӱмденна. Тушто модашат репертуарым ямдылена, — палемдыш В.Пектеев.
Икманаш, у тургымышто марий драматург-влакын пьесышт почешат ятыр постановко ончыкталтеш. Репертуарыш руш классикымат пуртымо.
А.БАЙКОВА
