Сергей Сметанин чрезвычайный ситуацийым шижтарыме да кораҥдыме да пожар лӱдыкшыдымылык шотышто республикын правительственный комиссийжын черетдыме заседанийжым эртарен.
Тушто илыме верлаште газ оборудований дене пайдаланыме годым лӱдыкшыдымылык нерген йодыш эн тӱҥ лийын. А тидлан амалым Челябинск ден Ростов областьлаште газ пудештме ыштен.
«Газпром газораспределение Йошкар-Ола» ООО-н специалистше-влакын палемдымышт почеш, газ оборудований тунам лӱдыкшыдымын да аварий деч посна пашам ышта, кунам кажне ийын техобслуживаний эртаралтеш. Туге гынат газовик-влак тудым эртарыме да ойпидышым ыштыме деч тореш лийме дене чӱчкыдынак вашлиялтыт. Тиддеч посна газ оборудованийым шке семын чӱктымӧ кугу лӱдыкшым ышта. Молан манаш гын тыгай годым лӱдыкшыдымылык нормо пудырталтеш, пайдаланаш палемдыме срок деч варат газ оборудованийым кучылтмат палдырна.
Россий МЧС-ын Марий Элысе Тӱҥ управленийжын пашаеҥже-влак ушештарат: газ пуш лекмеке, прибор дене пайдаланымым вигак чарныман. Тыгай годым тулым ылыжтыман, электроприборым чӱктыман да йӧртыман огыл. Кеч-могай азап лийме нерген газ службыш 04, 104 номер дене але экстренный службым ӱжыктымӧ 112 единый телефоныш йыҥгыртыман.
Л.Камалетдинова.
