2 февральыште Волжский районысо Памар селаште телымсе ГТО фестивальын икымше этапше (чылаже вич этап) иктешлалтын. Ечыгорнышто 165 участник вийжым терген.
Сеҥыше ден призёрым латкок тӱшкаште палемденыт. Организаторжо Памар ял шотан илемын ветеранже-влак лийыныт.
Флагым Упшер гыч Алина Зайкова ден Пӧтъял кыдалаш школ гыч Максим Степанов (шке ийготанышт-влак коклаште республикын сборный командыштыже улыт) нӧлталыныт.
Шокшо таҥасымаште сеҥышыш Памар, Пӧтъял, Шарача кыдалаш школла гыч участник-шамыч лектыныт.
– ГТО-м сдатлаш шонышо-влак ты гана ечыгорнышто таҥасеныт гын, 7 февральыште многоборьеште вийыштым тергаш тӱҥалыт. Тудыжо Приволжский кыдалаш школышто лиеш, – мане районышто физический культур да спортлан вуйын шогышо А.Михайлов.
– Тиде таҥасымаште мемнан школ гыч Юля Тимофеева, Антон Тимофеев, Максим Степанов икымше лийыныт, а эше кум ечызе кумшо верыш лектын. 8 февральыште Пӧтъял кыдалаш школышто «Надежда» таҥасымаш эрта. Участник-влак эрыкан йӧн дене куржыт. Кумылан-влакым пагален ӱжына, – ешарыш Пєтъял школышто физический культурым туныктышо А.Семёнов.
Е.Эшкинина.
