Телын пытартыш кечынже Йошкар-Оласе «Корта» ече базыште икмыняр организаций, ятыр команде таҥасымашке лектын. Игечын койышыжым ончыде, ты гана шуко еҥ вийжым терген.
Но эн тӱҥжылан «Марий Элын ечыгорныжо» таҥасымаш, туштак кумылан-еҥ-влакын ГТО нормативым сдатлымышт шотлалтын.
Тӱрлӧ амаллан кӧра старт тений 16 шагатат 30 минутышто пуалтын. Ечыгорныш эн ончыч изирак ийготан ӱдыр-рвезе-влак чымалтыныт. Палемдыме корным моткоч писын эртеныт. Старт дене финишыште вӱдат нуным лӱдыктен огыл. Южо вере участник-влакын йол йымалнышт вӱд «чопыж» шоктен, кок велыш шыжалтын. Поснак изирак-влакым чаманаш логале, вет опытышт эше уке. Сандене нунын коклаште камвочшыжат, ечытоям пудыртышыжат шукырак лийыныт. Тӱҥалтыштак моткоч писын тарванен куржмыштлан, адакшым ечыгорно иянлан кєра ятырышт камозыныт. Тыге икте-весылан изиш чаракым ыштеныт, жапымат йомдареныт.
Мутат уке, игече адакат лӱдыктен ыле: йӱдвошт, манаш лиеш, йӱр йӱрын. Но «Виктория» ече спорт школышто тыршыше-влак ончылгоч лумым ямдыленыт. Иктышт, шке машинешышт тележкым пижыктен, пасу гыч шупшыктеныт гын, весышт чодыраште, пушеҥге кокла гыч кольмо дене нумалыныт. Тидын шотышто нунылан таум ыштыме шуэш. Тыге паша деч вара каналташ толшо еҥ-влакланат ечыгорным ыштеныт.
Но 29 февраль эрдене мландым ош лум леведын. Тидыже шукыштын кумылыштым нєлталын. Тыге ечызе-влаклан таҥасымаш корныш лекташ ӱшан лийын. Тренер-преподаватель-влакын тургыжланымыштат моткоч шижалте. Икте, кольмым пижыктен, снегоход дене шинчын кудалеш, ечыгорным терген толеш, весе трассым тергаш куржеш. Тыгодым нунын ӱмбаке шыргыжалде ончалаш ок лий: йолыштышт молгунамсе семын портышкем огыл, а кугу резине кем.
Мо гынат, ты кечын палемдыме таҥасымаш-влак сайынак эртеныт.
Е.ЭШКИНИНА
