Марий Элын Тазалыкым аралыме министерствыжын 22 октябрь эрдене увертарымыж почеш, пытартыш суткаште регионысо больницыла гыч паремше 58 пациентым мӧҥгӧ колтымо, тыгодымак 90 черлым эмлалташ пыштыме. Тыге, теҥгече эрдене республикысе 10 инфекционный стационарыште медик-влак 919 гражданым у коронавирус инфекций деч эмленыт, ты чот гыч 177 пациент неле состоянийыште лийын, 18 черле шодым искусственно вентилироватлыме йӧн дене шӱлен, 384 еҥлан кислород кӱлын.
«Коронавирус: статистика» сайтын 22 октябрьысе данныйже почеш, пытартыш суткаште Марий Элыште COVID-19 дене инфицироватлалтме 51 случайым официально регистрироватлыме. Пандемий пагытыште у коронавирус инфекций дене чылаже 5682 еҥ черланен, 4672 пациент паремын, 61 черле колен.
Тиде шучко инфекций деч шкендамат, лишыл еҥда-шамычымат аралыза: маске, резинке перчатке, антисептик дене пайдаланыза, кидым шовын дене чӱчкыдын мушса!
М.ИВАНОВА
