Марий Элым вуйлатыше Йошкар-Олаште шўкшакым ойыркалыме комплексыш миен коштын. Тидын годым Александр Евстифеев производственный базым да специализироватлыме техникым ончен савырнен, тыгак шӱкшакым ойыркалыме технологий дене палыме лийын.
Тачысе кечылан «Благоустройство» ООО пеҥгыде коммунальный шӱкшак дене пашам ыштыше икымше региональный операторлан шотлалтеш. Тиде предприятийыште шӱкшакым ойыркалыше комплекс талукышто 100 тӱжем тонн шӱкшакым ойыркален кертеш. Ойыркалыме линийым 2007 ийыште пашаш колтымо. Тушко Йошкар-Ола да Медведево район гыч ий еде 200 тӱжем наре тонн шӱкшакым намият.
Ойыркалыме деч вара кокымшо гана перерабатыватлаш йӧрышӧ материал ятырак погына. Марий Элым вуйлатышылан каласкалыме почеш, погынышо кагаз ден картоным Волжск оласе целлюлоз-кагаз комбинатыш колтат, а янда ден пластикым – Ульяновск областьыш. Моло кодшыжым Медведево районысо Кучко лесничестве кундемыште верланыше полигоныш ужатат.
«Благоустройство» ООО-н директоржо Наиль Исхаковын ойлымыж почеш, кызыт предприятийыште кокымшо гана кучылташ йӧрышӧ материалым перерабатыватлыме производствым почмо нерген шонат.
Кызыт задаче тыгай: нигӧ вуйым ынже ший, чылан икшырымын пашам ыштен кертышт манын, пӱтынь технологий процессым терген келыштарыман, каласен Александр Евстифеев.
Шӱкшакым перерабатыватлыше комплексын куатше изи, республикылан ситыше огыл. Мемнан дене ик оператор гына лийшаш огыл, тудо вараже монополистыш савырна. Сандене кокымшо оператор кӱлешак, тиде йодышым тений тєрлена, палемден республикым вуйлатыше.
Региональный операторын пеҥгыде коммунальный шӱкшакым шупшыктымо 50 утла автомобильже уло. Но тидыже «шӱкшак» реформым шуктышашлан шагал, палемден Марий Элым вуйлатыше. Тудын ойлымыж почеш, оператор ден подрядчик-влак тачысе кечылан мемнан ончылно шогышо задачын кок визымше ужашыжым веле шуктат.
«Да, нуно у техникым налыт, олаште контейнер паркым чумырен шуктеныт, но тиде паша ончыкыжат шукталтшаш. Ме верысе общественность дене пырля тидым тўткын эскерена да нунылан пашам ышташышт полшена, вет тидыже нацпроектым шуктымаште моткоч кўлешан»,- каласен пытартышлан республикым вуйлатыше.
Объектыш миен коштмым иктешлымыж годым Александр Евстифеев шӱкшакым погымо контейнер-влакым вашталтен толмо да нуным угыч палемдыме верлаште вераҥдыме графикым ышташ предприятийым вуйлатышылан да муниципальный образований-влакын вуйлатышыштлан кӱштен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
