1 май гыч ава капитал гыч кокымшо йочалан тылзе еда тӱлыман выплатым налме нерген йодмашым илыме верысе огыл, а чыла клиент службыш але Россий Пенсий фондын виктемышкыже пуаш лиеш.
Ушештарена: ава капитал гыч тылзе еда тӱлыман выплатым налме нерген йодмашым ешыште кокымшо йоча шочмо деч вара 1,5 ий жапыште пуаш лиеш. Тудым икшыве шочмо деч вара икымше пел ийыште пуаш гын, выплате йоча шочмо але икшывым ашнаш налме кече гыч тӱлалтеш, да еш оксам эртыше жапланат тичмашнек налеш. Тидым аза шочмо деч пел ий вара ышташ гын, выплате йодмашым пуымо кече гыч ойыралтеш. Окса ава капитал озан российский кредит организацийысе счётышкыжо колталтеш.
2019 ийыште регионыштына тылзе еда тӱлыман выплатын кугытшо – 9545 теҥге, тыгодым ешын доходшо ик еҥлан шотлымаште 14574 теҥге деч кугу лийшаш огыл.
Тений идалык тӱҥалтыш гыч ава капитал гыч тылзе еда тӱлыман выплатым налме нерген 185 йодмашым пуымо, ты чот гыч 62 йодмашыже – выплатым 1,5 ий марте шуйымо нерген.
Выплатым налаш права уло-укем кажне еш Россий Пенсий фондын сайтыштыже калькулятор полшымо дене шке шотлен луктын кертеш.
М.ИВАНОВА
