Эртыше кечылаште Медведево районысо суд «116 арсенал» акционер ушемын кум вуйлатышыжлан приговорым луктын. Нуно боеприпас кӱшеш шуко оксам ыштен налыныт.
— Ушем директорын икымше алмаштышыже А.В.Алатырцевын, бухгалтерлан пашам ыштыше пелашыже Г.Н.Алатырцеван да боеприпасым утильыш колтымо цех начальник В.В.Сызгановын ондалкалымыштым Россий ФСБ-н Рӱдӧ военный округшын управленийыштыже пален налыныт.
Нине кум еҥ мошенник пашам 2012 ий годсек шуктеныт. Нуно госконтракт почеш утильыш колтымо боеприпасла гыч лукмо цветной металл кӱшеш оксам ыштеныт. Тидлан кӧра кугыжанышлан 2 миллионат 700 тӱжем теҥгеаш эҥгек ышталтын, — палемда Россий ФСБ-н Рӱдӧ военный округысо управленийжын пресс-службыжо.
Тиде управленийынак колтымо фотографийлаште стрелковый оружийлан 100 миллион патроным утильыш колтымо деч вара мо кодмым ужаш лиеш. Гильзе гыч «курык» — кум пачашан пӧрт кӱкшытан! Кажне патронышто ала-кунам свинец лийын. Но тудым нине кум еҥ, кугыжанышлан пуымо олмеш, шолыштын.
Преступленийым ыштымыштлан суд предприятий вуйлатышын алмаштышыжым эрык деч посна 4 ийлан кодаш да общий режиман колонийыш колташ, пелашыжым 3 ийлан судитлаш пунчалым луктын. Но изирак эргыштлан 14 ий темын огыл, сандене тиде жап марте ӱдырамашлан отсрочко пуалтын. Цех вуйлатышым кум ият пелылан условно судитленыт. Чылаштынат кусараш лийме погыштым да счетыштым арестоватленыт. Тиде 2,7 миллион теҥгеаш эҥгекым ыштымым пӧртылташ кая.
Кызытеш приговор илышыш пурталтын огыл. Тудым обжаловатлен кертыт.
Л.Камалетдинова.
