СПОРТ

Куржыныт, Шап марте, Йӱштылыныт яндар ерыште

Ятыр ий июнь тӱҥалтыште Марий Элыште «Йошкар-Ола – Шап»  изи марафон лийын. Тудын организаторжо, энтузиаст-физкультурник – В.Мочаев. Тӱрлӧ амаллан кӧра пытартыш икмыняр ий тудым эртарен огытыл, но…  Пелемарафоным Марий Элын рӱдолашкыже кусареныт. Кумылан-влак, Йошкар-Олан кечыжлан пӧлеклен, августышто ола уремла мучко тӱшкан куржыт.  

Йӱлам йомдараш огыл манын, В.Мочаевын вуйлатымыж денак, таза илышым кучышо кумылан икмыняр спортсмен кажне ийын, куржталме корнышко лектеш. Тыге нуно кумло ий ончыч тӱҥалме йӱлам шуяш тыршат.

2 июньышто вич еҥ Кокшайск корнышкыла чымалтыч.

Сылне марий пӱртӱс, тасма гай шуйналтше корно, яндар Шап ер, кайык муро, шкем сеҥымаш – теве мо сымыстара нуным тышке.

– Мый Олег пелашем дене пырля тарванышым. Игечыжат таче пеш мотор, сай. Такшым икмыняр ий ончыч ты тӱшка стартыш лектынам, моло дене пырля Шап ер мартеак куржынам. Келшен. Тиде трассе мыланем чонлан лишыл. Финишыш шуат – ландышын пушыжо кумылым савыра. Пӱртӱсшӧ могай чапле! Пӱнчӧ, кож коклаште яндар южым шӱлалташ, канаш – сай йӧн, – ойла ече дене спорт мастер Эмма Кириллова.

– Шке жапыштыже сай спорт пайрем ыле. Тиде тачат кєргыштем ила. Чонышто уло гын, йӱлам арален кодымо семын молан куржаш огыл… Шкан кажне кечын 5-10 километржым эртем. Сандене мучаш марте чарныде куржын миен шуаш шонем, – мане Йошкар-Ола – Шап пелемарафонын  «кресачаже», спорт энтузиаст В.Мочаев.   

Е.Эшкинина.

Снимкыште: старт пуалтын.

Авторын фотожо.

Опубликовать в Одноклассники

Добавить комментарий