СПОРТ

Куржталын полшат

8 мартыште, тӱнямбал ӱдырамаш кечын, Марий Элыште физкультурник-влак поро кумыл акцийым эртарат. Тудо «Мандарин куржталмаш» маналтеш.

Акций Волжскышто илыше шым ияш Даниил Домрачевлан операцийым ышташ полшымо шот дене эртаралтеш.

Тыгай спорт мероприятий йӱлаш пурен. Тудлан тӱҥалтышым Йошкар-Олаште скандинав коштмашын «Пойдём ходить по Йошке!» да куржталаш йӧратыше-влакын «Айвика» клубышт ыштеныт. Теният нунак эртарат.

Мероприятий Патриарший площадьыште 9 шагатлан тӱҥалеш, а старт 10 шагатлан пуалтеш.

Акцийыш ушнышо-влак Брюгге набережный мучко эн шагалже кум километрым куржын але тыглай ошкылын эртен кертыт. Эн кужу кутыш 3-12 километр. Кажне 1,5 километрым эртыме верыште мандариным кучыктат.

– Тиде мероприятий Данииллан шерге операцийым ышташ ача-аважлан полшымо шот дене эртаралтеш, – манын палемдышт куржталаш йӧратыше-влакын «Айвика» клубыштышт.

Е.ЭШКИНИНА

Опубликовать в Одноклассники

Добавить комментарий