2 июньышто Волжский районысо Мӱшыл ер воктене (Руш Шайра) курыкышто куржталме дене Россий гран-прин черетан этапше лийын. Тудо М.Шкетан лӱмеш кугыжаныш Марий драме театрлан 100 ий теммылан пӧлеклалтын. Мероприятийым Волжский район, верысе администраций, театр пашаеҥ-шамыч, куржталше-влакын клубышт эртареныт.
Таҥасымашке профессионал-спортсмен дене пырля тунемшат, тыглай еҥат регионнан тўрлє кундемже, пошкудо республикла гыч чумыргеныт, вийыштым тергеныт.
Верысе организатор-влакын уна-шамычым саламлымышт деч вара икымше забег театрыште тыршыше-влаклан лийын. Нунышт тӱшкан курыкышкыла чымалтыч. Мутат уке, ямдылалтме деч посна нелырак лийын, но, палемдыме корным куржын эртен, чыланат финишыш толын шуыч.
Ӱдыр-влак кокла гыч финишыш кок Марина эн ончыч куржын тольыч.
– Тыгай таҥасымаште икымше гана куржталам. Капым тарватылаш, лывырташ манын шонымаш дене лектынам. Икымше верым налаш шонен омыл. Тыге лекте, – ойла М.Воронцова.
– Сай пайрем. Еҥым ончена, шкенам ончыктена. Йӱр йӱрын, яклака, но чытышна, тура курыкым налын кертна. Пеш сай. Теве ынде ерыш йўштылаш каена, чывылалтын лектына, – шўлешт-шўлешт, шыргыжалын мане М.Почтенева.
Пӧръеҥ-влак коклаште Иван Соловьёв ойыртемалте:
– Курыкшым лӱдын, лӱдын воленна. Яклака. Но кумыл нєлтшє.
М.Шкетан лӱмеш Марий кугыжаныш драме театрын художественный вуйлатышыже В.Пектеев тыге мане:
– Тиде мероприятийым таза илыш-йӱлам кучымо шотышто сай тӱҥалтыш семын палемдыман. Артистат спортсмен, физкультурник лийшаш. Айдеме таза гын, чыла паша сайын ворана. Куаненна: Марий театрым аклат, йӱштӧ чонан огытыл. Мыланна тиде – моткоч кугу пӧлек. Театр ила гын, марий калык, марий йылме аралалт кодыт. Айдеме таза, поро кумылан лийшаш. Ме куржталмашке ушнена, спортсмен-влак театрыш толыт. Тыге, пырля келшен, икте-весым умылен гына сай лектышыш шуаш лиеш.
Игече ты кечын кажныжым куандарен. Южышт лач таҥасымаште вийым тергаш толыныт гын, шукыштлан ты кече сылне пӱртӱс коклаште, мотор вершӧрыштӧ пайдале каныш, икте-весым ужын кутырымо семын кужу жаплан шарнымашеш кодеш.
Е.ЭШКИНИНА.
