Россий ФСБ-н Марий Элысе управленийжын пашаеҥже-влак Марий Элыште Йошкар-Оласе рӱдӧ паркын ончычсо директоржо А.Шестаковын должностной полномочийже дене утыждене пайдаланымыжым да оксам арам кучылтмыжым пален налыныт да тиде преступленийым ыштымыжым тӱжваке луктыныт, вараже ончычсо директорым титаканлан шотленыт да судитленыт манын возенна ыле.
Ушештарена: 2014 ий январь гыч 2019 ий май марте А.Шестаков служебный положенийже дене пайдаланен да «Парк «Мир развлечений» ООО дене йӱкым кугемдыше (звукоусилительный) аппаратурым рынке ак деч шергыракын пуаш да тидлан оксам тӱлаш йодмашан ойпидышым ышташ темлен. Тиддеч посна индивидуальный предпринимательлан офис пӧлемым да гараж боксым арендыш пуэн. А тидлан оксажым «Парк «Мир развлечений» ООО-шко тӱлаш темлен. Тидлан кӧра парклан 2 миллион утла теҥгеаш эҥгек ышталтын. Следствий жапыште тиде эҥгек организацийлан пӧртылталтын.
Икымше инстанций суд А.Шестаковым 2 ий да 3 тылзылан эрык деч посна кодаш, общий режиман колонийыш колташ, 200 тӱжем теҥге штрафым тӱлыкташ, наказанийым шуктымекшат эше 2 ий вуйлатыме пашам шукташ права деч посна кодаш пунчалым луктын.
Тиде уголовный делам Марий Элын Верховный судыштыжо аппеляций радам дене келшышын 22 июльышто онченыт. Суд паркын ончычсо директоржым кужурак жаплан — 2 ий да 9 тылзылан — эрык деч посна кодаш пунчалым луктын. Моло шотышто вашталтыш лийын огыл, палдара Россий ФСБ-н Марий Элысе управленийжын пресс-службыжо.
Л.КАМАЛЕТДИНОВА
