Марий Эылсе полицийын ийготыш шудымо-влакын пашашт шотышто подразделенийже-влакын, ППС-ын пашаеҥышт, участковый уполномоченный, наркополицейский-шамыч «Йоча-влак – йӱд олаште» профилактике акций дене келшышын, кодшо каныш кечылаште рӱдолаште да районлаште тергымашым эртареныт.
Нуно скверлаште, парклаште, стадионлаште, кудывечылаште, ужалыме верлаште, клуб ден дискотекылаште лийыныт да ача-авашт але законный предствительышт деч посна коштшо 37 ӱдыр-рвезым вашлийыныт. Ынде нунын ача-аваштлан административно мутым кучашышт логалеш. Тиддеч посна ийготыш шудымо кок самырык еҥ тӱшкан пайдаланыме верлаште йӱшӧ коштмыштлан административно мутым кучаш тӱҥалыт.
Марий Элысе МВД пашаеҥ-влак ушештарат: закон дене келшышын, 18 ийым темыдыме ӱдыр-рвезе-влак 22 шагат кас гыч 6 шагат эр марте тӱшкан пайдаланыме верлаште шкетын лийшаш огытыл. Тыгодым коча, кова, чӱчӱ, чӱчӱньӧ, иза, ака нунын законный представительыштлан огыт шотлалт.
Ийготыш шудымо-влакын аракам йӱмышт, наркотик дене пайдаланымышт, шкем шот дене кучыдымышт нерген кӧ иктаж фактым пала гын, полиций пашаеҥ-влак тыгай номер дене «Ӱшан телефоныш» йыҥгырташ йодыт: (8362) 68-00-00 але 102.
Л.КАМАЛЕТДИНОВА