Эртыше рушарнян М.Шкетан лӱмеш театрыште чынжымак пайрем шӱлыш озаланыш. Ончылгоч увертарыме семынак, тыште Шернур ден Кужэҥер район-влакын кечышт эртаралте.
Тидыжым Российын сулло да Марий Элын калык артистше, Марий Эл Кугыжаныш премийын лауреатше, поэт, писатель да драматург Василий Регеж-Гороховын 80 ияш лӱмгечыж дене кылдыме. Василий Михайлович 27 августышто лач тынар ийым ваче ӱмбакше пыштыш. А теве тудо чонжылан лишыл верыш, театрыш, калык дене вашлиймашке, толын. Чын, тазалыкше начаррак, ондаксе семын кужун кутыренат огеш керт, но кумылжо дене тудо эре мемнан дене пырля. Да тиде кастене тудын шочмо Кужэҥер районжо дене Шернурым арам огыл ушымо. Василий Михайлович тиде кундемымат шочмо кундемжыланак шотла, вет Регеж ялже нине кок район ушнымаште верланен. Юбилярым ты кастене Кужэҥер район лӱм дене верысе администраций вуйлатышын алмаштышыже Н.Желонкина ден культур отдел вуйлатыше С.Швецова, Шернур гыч верысе администарций вуйлатышын алмаштышыже Н.Ямбаршева саламленыт. Нунын пӧлекыштлан вашеш В.Горохов шкенжын книгаже-шамычым кучыктен. Тудлан шканже эн лишыл – пытартыш пашаже, «Регеж карман» эпос.
Кумданрак — «Марий Эл» газетын
2017 ий 28 октябрьыште лекше номерыштыже лудын кертыда.
С.БЕЛКОВА.
