Тиде кечылаште Сеҥымаш тоштер элыштына кумдан палыме йоча писатель Владислав Крапивиным шарныме лӱмеш увертарыме сылнымут конкурсышто сеҥыше-влакым увертарен. 7-10 ияш-влак коклаште кумшо верым Марий Элыште илыше 9 ияш Вячеслав Томчак «Счастливая находка» ойлымашыж дене сеҥен налын.
Участник-влаклан келшымаш, ӱшанле улмо да школышто пырля тунемше йолташ-влак нерген ойылмашым возаш темлалтын. Конкурсыш Российын 22 регионжо гыч чылаже 200 утла самырык еҥ шке пашажым колтен. Сеҥыше-влаклан электрон почто дене дипломым колтат да «Калыкын подвигше» у экспозицийыш экскурсийыш билетым пӧлеклат.
Палашлан, Владислав Крапивин лӱмеш сылнымут конкурсым Сеҥымаш тоштер тений сентябрьыште увертарен. Конкурсант-влакын пашаштым кумдан палыме писатель, поэт-влак акленыт. Нунын кокла гыч иктыже – Россий писатель ушем член, йоча поэт Ванда Медведева. А Владислав Крапивин шотышто ойлаш гын, тудо йоча-влаклан ятыр йомакым, фантастике сынан ойлымашым, ийготыш шудымо-влак нерген илыш гыч налме прозым пӧлеклен. Книгаже-шамыч ик гана веле огыл Польшышто. Чехословакийыште, Болгарийыште, Германийыште, Японийыште, Венгрийыште савыкталтыныт, тыгак сылнымут пашажым англичан, испан да моло йылмыш кусареныт. 1961 ий тӱҥалтыште Крапивин Свердловскышто йоча флотилийлан негызым пыштен да 30 ий тудын командоржо лийын. «Каравелла» отряд кызытат ила: йоча-влак журналым савыктат, кином сниматлат, фехтований дене занятийлаште шуаралтыт, теҥыз паша дене палыме лийыт, яхтым чоҥат да Урал кундемысе ерлаште ийын коштыт. Чаманен каласыман, Владислав Крапивин шӱмжӧ тений 1 сентябрьыште кырымым чарнен.
Г.КОЖЕВНИКОВА
