Шижынат ышна шукто Инвалид-влакын III всероссийский кеҥеж спартакиадышт эртенат кайышт. Федерал кӱкшытан тыгай кугу спорт форум Марий Элын рӱдолаштыже икымше гана тынар шуко калыкым ик верыш ушен.
Тудым эртарен колташ кундемыштына чыланат чот ямдылалтыныт. Ты пашам регион вуйлатыше Александр Евстифеев шкежак эскерен.
Йошкар-Олаште ятыр вере корным ачалыме, олам сӧрастарыме, спорт объектлаште олмыктымо пашам ыштыме, спартакиадын участникше-влаклан лӱмын келыштарыме транспортым кондымо да молат.
Спартакиадыш толшо-влак МарГУ-н да ПГТУ-н тӱшкагудылаштышт иленыт. Тӱрлӧ регион гыч толшо-уна-влакым вашлияш манын, туштат олмыктымо пашам ыштеныт. Тиддеч посна вакшышыш шартышым, кӱпчыкым да одеалым налыныт.
Кугу таҥасымашын участникше-влакым вуз-влакын, строительный техникумын столовыйлаштышт, тыгак «Спортивный остров» кафеште пукшеныт. Тиде амал денак МарГУ-н «Мередиан» кочмывержым олмыктеныт. Тушто тувырашым, пырдыжым чиялтыме веле огыл, шинчын кочшашлык верымат кок пачаш шукемденыт. Адакшым чылажымат тазалык шотышто экшыкан, коляске дене куснылшо-влаклан келыштареныт.
Таҥасымаш-влак «Дружба» стадионышто, тусо Теннис кортышто, Вӱд спорт полатыште, физкультур да тазалыкым пеҥгыдемдыме «Спартак» комплексыште, «Марий Эл» ий полатыште эртеныт. Кугу спорт мероприятий тӱҥалме деч ончыч кажне объектым тӱткын ончен лектыныт, терроризм да пожар лӱдыкшыдымылык шотыштат эскереныт, кажне объектшым олмыктымо.
Ончыкыжым тидын дене республикыште илыше калык пайдаланаш тӱҥалеш. А тидыже тугак лийшаш, вет пӱжвӱдым йоктарен ыштыме пашан палыже сайынак кодшаш.
Инвалид-влакын III всероссийский кеҥеж спартакиадышкышт делегаций-влак 11 июльышто толаш тӱҥалыныт. Нуным кӱртньыгорно вокзал але вуз-влакын тӱшкагудышт ончылно марий вургеман волонтёр-влак кинде-шинчал дене вашлийыныт, пӧлемышт марте ужатеныт.
Икманаш, тыгай кугу спорт мероприятий Марий Элыште икымше гана эртен, сандене тудлан моткоч сайын ямдылалтме, шуко паша ышталтын. А тидыже моткоч куандара, вет спартакиаде амал дене тӱрлӧ вере олмыктымо паша шукталтын, шуко арверым налме.
«10 +» отметкым шынденыт!
Спартакиадым кугу пайрем семын почмо. Тидлан ынде кок арня наре эртен гынат, организатор ден спортсмен-влакат, верысе калыкат поро мут дене шарнат да ончыкыжымат шарнаш тӱҥалыт.
Спорт шӱлышан пайремыш погынышо-влакым Марий Эл вуйлатыше Александр Евстифеев, Российын спорт министржын алмаштышыже Марина Томилова, Юл кундем федерал округышто Россий президентын полномочный представительжын полышкалышыже Владимир Колчин, РФ Федерал Погынымашын Федераций Советшын тӱнямбал паша шотышто комитетшын председательжын алмаштышыже, Российысе Паралимпийский комитетын президентше Владимир Лукин саламленыт.
Спартакиаде республикыште илыше-влакын ушыштышт ик эн про шарнымаш семын илаш тӱҥалеш. А ме палена, Спартакиаде деч вара кундемыштына спорт инфраструктур эшеат вияҥеш, тидлан кӧра республикыштына илыше да тазалык шотышто экшыкан еҥ-влак кокла гычат спортлан шӱмаҥше ий еда ешаралтеш. Лач тидын нергенак палемден регион вуйлатыше спартакиадым почмо годым.
А Российын спорт министржын алмаштышыже М.Томилова кугу спорт мероприятийым эртарымылан кӱкшӱ акым пуэн:
— Моткоч сайын ямдылалтында! «10 +» отметкым шындем! Йошкар-Ола моткоч шуко унам вашлийын, чылалан чыла келша, нигӧм нимо ок тургыжландаре. Чынжымак Марий Элын рӱдолаже тидлан сайын ямдылалтын. Ме шуко спорт мероприятийым эртаренна, но але марте тыге ямдылалтмым нигуштат ужын огынал.
Алевтина Байкова
