СОЦИАЛ ИЛЫШ

Кугу тӱняш икымше ошкыл йочасадыште ышталтеш

Икшывылан йочасад – тиде икымше тунемме вер. Лач тыште тудо кугу тӱняшке икымше ошкылым ышта, возаш, шотлаш, лудаш тунемеш.

24 мартыште У Торъял районысо Шӱвылак ялысе «Василёк» йочасадлан   30 ий темын. Тидын лӱмеш кугу пайрем эртен.

Пайрем шӱлыш, манмыла, омсалондем гычак шижалтын: полат коргыштӧ кумылым нӧлтышӧ муро йоҥген; изи ӱдыр-рвезе-шамыч пайремыште каласкалышаш почеламутыштым уэш-пачаш шарналтен ойленыт; куштымашым ончыкташ ямдылалтше-шамычын тавалтымышт шоктен. Садикыште пашам ыштыше-шамыч, мероприятий палемдыме семын сайын эртыже манын,  чылажымат угыч ончен лектыныт, кӱлеш гын, иктаж-мом ешареныт. А пайрем шӱлышым пурташ уна-влак полшеныт. Тыште нуным эреак кумылын вашлийыт. Но тиде кечын кажныже поснак вучымо лийын, вет нуным «Василёк» палымым ыштен да келшен илыше ешышкыже ушен. Нунын кокла гыч шукынжо тыште шке шӱм-чон шокшыштым коденыт.

Санденак 30 ий теммылан пӧлеклалтше пайрем моткочак тыматлын да порын эртен. Музыкальный залыш тиде кечын тыште ончыч пашам ыштыше да кызытсе коллеге-влак веле огыл, тыгак йолташыштат чумыргеныт. Нуным йочасад вуйлатыше Зульфия Тажибаевна Бирюкова вашлийын. Да пайрем тӱҥалын! Концерт программе моткочак ойыртемалтше,  кумылым вӱчкышӧ лийын. Тушто педагог ден садикыш коштшо-шамыч, ончычсо выпускник-влак, тыгак верысе тӱвыра пӧрт пелен чумырымо «Мӧр алан» ден «Шонанпыл» ансамбльын участникше-влак погынышо уна ден ача-ава-влакым сылне муро да куштымашышт дене куандареныт. Тыгак йочасадыште тӱрлӧ жапыште тыршыше-влак ончычсо жапышт, кузе пашам ыштымышт нерген шарналтен каласкаленыт. Мутлан, Нина Викторовна Горохова ден Любовь Абрамовна Щербакова тышке йӧршеш самырык ӱдыр пашам ышташ толыныт да сулен налме канышыш лекмешкышт изи чукай-влак коклаште лийыныт.

Йочасадым пайремже дене саламлаш «У Торъял муниципальный район» муниципальный образованийын финанс отдел вуйлатышыже Л.Гродикова, Чӱксола ял шотан илем администраций вуйлатыше А.Ермаков, У Торъял муниципальный район администрацийын вӱдышӧ специалистше М.Новикова, «Икымше май» колхозын представительже-влак, тиде ялынак шочшыжо, Марий Эл республикын калык артисткыже С.Строганова да дошкольный учреждений вуйлатыше-влак толыныт.

Тиде кечын чыланат йочасад пашаеҥ-влакым моктен, нунылан тауштен, ятыр поро мутым да тыланымашым ойленыт. Чон вошт колтен каласыме кажне шомакышт ден тыланымашышт шукталтеш манын ӱшаныме шуэш. Тек тиде йочасадыш коштшо ӱдыр-рвезе-шамыч ончыкыжым шочмо ялыштлан, кундемыштлан, шочмо элыштлан кӱлшӧ, пайдам кондышо да поро пашам ыштыше шотан айдеме лийыт.

Любовь Камалетдинова.

Опубликовать в Одноклассники