ШКОЛ ЙОЛГОРНО

Кугу артист семынак

Йошкар-Оласе кугыжаныш общеобразовательный организацийлаште тунемше-влаклан эртарыме «Живая классика» VIII всероссийский конкурсын муниципальный этапшым иктешлыме. Республикыштына тудо кок номинаций дене эрта, иктыштыже прозо гыч ужашым марла лудман, а весыштыже – рушла.

Тиде гана россий да марий прозаик-влакын произведенийышт гыч ужашым сылнын лудмо шотышто рӱдоласе тунемме верлаште чылаже 15 тунемше мастарлыкшым ончыктен. Тыге марий йылме дене прозо гыч ужашым эн чаплын Национальный президент школ-интернатын тунемшыже Фаина Беляева (снимкыште) лудын. Ӱдыр М.Шкетанын «Мыйын упшем» произведенийже гыч ужашым йоҥгалтарен.

Руш йылме дене эн уста «артист-влаклан» Бауман лицейын тунемшыже-шамыч Иван Ероповым да Ксения Черноусовам, Т.В.Иштрикова лӱмеш «Канде кайык» гимназийын тунемшыже Мария Торщинам шотлымо.

Нуно муниципальный этапыште сеҥыше моло йоча дене пырля конкурсын регион кӱкшытан этапыштыже мастарлыкым ончыкташ тӱҥалыт. Тудыжо тений 9 апрельыште эртаралтеш.

Г. Кожевникова

Опубликовать в Одноклассники

Добавить комментарий