Т.Евсеев лӱмеш республикысе калыкле тоштерын йоча тоштер-ончер рӱдерыштыже финн-угор калык-влакын вургемышт дене палдарыше оҥай ончер почылтын.
Тудо «О народах, чьи предки едины» маналтеш. Ончер марий калыкын икымше погынжым эртарымылан 100 ий теммылан пӧлеклалтын. Марий, мордва, одо, хант, венгр, финн, эстон калык-влакын костюм колекцийышт ончыкталтыт. Тыгак тушто тыглай илышыште кучылтмо, пашам ыштыме арверым ужаш лиеш. Чыла тидыже XIX–XX курымлаште илыше финн-угор калык-влакын материальный тӱвыраже могай улмым почын пуа.
Ончерым Российысе тоштерласе фонд-влакын фотоматериалышт дене пойдарыме. Республикысе тоштерын нунын дене кылже сай. Мутлан, финн-угор калык-влакын илышыштым ончыктышо историй дене кылдалтше фотографий-влакым К. Герд лӱмеш Удмуртий Республикын калыкле, И.Д.Воронин лӱмеш Мордва Республикын краеведений да Хант-Манси автономный округын Пӱртӱс да айдеме тоштерже колтеныт.
Тиде ончер туризм, тӱвыра сферыште тыршыше, тунемме заведенийлаште шинчымашым нӧлтышӧ-влаклан пайдале лийшаш. Тоштер пашаеҥ-влак икшыве-влаклан ончерым ончал савырнаш кумылаҥдыше икмыняр посна программымат ямдыленыт.
С.Носова.
Снимкылаште: тоштерын пашаеҥже Анастасия Григорьева йоча- влаклан экскурсийым эртара; ончерын экспонатше-влак.
М.Скобелевын фотожо.
