Тыгеат лиеда: чын ойлымым, чын ыштымым южо еҥ сайлан ок шотло, эсогыл намысла. Поснак ӱшаныме, эҥерташ шонымо еҥын тыгай койышыжлан кумыл вола. А библийын лишыл еҥым веле огыл, тушманымат ик семын йӧраташ туныктымыж шотышто иктаж гана шоналтенда? Ала тидыжат-тудыжат лачшымак нине еҥ улыт? Ты шотышто ик притчым лудаш темлена.
…Икана уныка ден коча пошкудо селасе пазарыш кочкыш йӧрварым налаш тарваненыт. Пӧртылмӧ годым нумалтыш неле лиеш манын, пеленышт ишакым налыныт.
Ончыч ишак ӱмбак коча кӱзен шинчеш, уныка воктенже ошкылеш. Тыгай сӱретым ужшо калык вуйжым ӧрмалген рӱза:
– Ончалза, могай пӧръеҥ! Шкеже ишак ӱмбалне кудалеш, а йочам йолын наҥгая. Намысдыме!
Коча ишак ӱмбач вола да олмешыже уныкажым шында. Ваштарешышт толшо-влак нунын ӱмбак эсогыл парням ончыктен ойлат:
– Ончыза, могай шотдымо йоча! Кугу вуйжо дене ишак ӱмбалне кая, а шоҥго коча йолын ошкылеш! Намысдыме!
Тунам уныка ден коча коктынат йолын ошкылаш кутырен келшат. Калык нуным тидланат койдара:
– Ончалза, могай окмак улыт! Ишак улмо ӱмбач йолын ошкылыт!
Тиде мо нерген ойла? Икымше, мом гына: сайым ма осалым – ит ыште, калыклан эре от йӧрӧ, уда мутым садак муэш. Кокымшо, чын улмым палет гын, еҥын мом ойлымыжым шотыш ит нал. Кумшо, кажне айдеме шке семынже вияҥеш, ушым пога, мунлыш савырна. Еҥ уш дене илаш гын, шке шонымашкет от шу.
Тидым уныкада-влаклан ойлыза.
М.ИВАНОВА.
