УВЕР ЙОГЫН

Коча-кова-влак тунемыт

Февраль мучаште пенсионер-влак тений икымше гана «Компьютер грамотын негызше» программе почеш тунемаш тӱҥалыныт.

Тиде событий дене преподаватель ден студент-влакым Россий Пенсий фондын Йошкар-Оласе виктемжын начальникше Евгений Францев саламлен. Компьютер ден интернет кажне айдемын илышыжым палынак куштылемдат, кугыжаныш услугым, ты шотыштак Пенсий фонд велым, куштылгынрак да писынрак налаш йӧным ыштат, палемден тудо.

Пенсионер-влакын икымше тӱшкашт Марий радиомеханический техникумышто шинчымашым налеш, молыштым Марий кугыжаныш университетыште да Межрегиональный открытый социальный институтышто туныкташ палемдыме. Тений тунемме шагатым ешарыме, программым кумдаҥдыме. Пенсионер-шамыч текст да графике редактор дене пашам ышташ, кызытсе жапыште кӱлешанлан шотлалтше социальный сетьла, увер ресурсла, интернет дене лӱдыкшӧ деч посна пайдаланаш тунемыт. Программышке компьютер грамотность курс дечын посна планшет да смартфон дене пашам ыштыме тренингымат пуртымо.

Курсым Россий пенсионер-влакын ушемышт финансироватла, сандене колыштшо-шамыч чылт яра тунемыт.

Палемдыме курслаште Йошкар-Олаште веле огыл, республикын районлаштыже илыше пенсионер-шамычат шинчымашым налын кертыт.

Курсыш возалтме нерген чыла йодышым Россий пенсионер-влакын ушемыштын верысе пӧлкалаштышт рашемдаш лиеш.

М.ИВАНОВА

Опубликовать в Одноклассники

Добавить комментарий