26 апрельыште Марий тӱвыра рӱдер республикын Образований да науко, Тӱвыра, печать да калык-влакын пашашт шотышто министерствылаже, МарНИИЯЛИ, Российыште илыше марий-влакын федеральный национально-культурный автономийышт полшымо дене «XXI курым тӱҥалтышысе еш поянлык да тудын тукымвож серлагышыже» республик кӱкшытан краеведений конференций-конкурсым эртарен. Мероприятий Марий талешке кечылан пӧлеклалтын. Тушко школышто да ссузышто тунемше ӱдыр-рвезе-шамыч ушненыт. Самырык шымлызе-влак еш тукымвожым, мӧҥгыштышт ятыр ий аралалтше арвер-влакын историйыштым шымленыт.
Конференций тӱҥалтыште Марий Эл Правительстве председательын икымше алмаштышыже М.Васютин, В.М.Васильев лӱмеш Йылмым, сылнымутым да историйым шымлыше институт директор Е.Кузьмин пайрем дене саламленыт да ӱдыр-рвезе-влаклан сеҥымашым тыланеныт.
Конкурсышто ончыктымо кажне паша шке семынже ойыртемалтын. Тунемше-шамычын презентацийым ямдылымышт годым ятыр шымлымашым эртарымышт шижалтын. Но икте кумылым волтен: докладым шукынжо рушла ыштеныт.
А теве Марий Турек район Сардаял школын тунемшыже-влак пашаштым марла лудын пуэныт. Тыште, мутат уке, директор Полина Владимировна Сорокинам мокталтыман. Тудо тунемшыже-шамычым пеш сайын ямдылен. Юлиана Ермолаеван «Ковамын каваже» пашаже шкешотан лийын. Шымлымаш коважын кӱнчылажлан пӧлеклалтын. Марий Турек велне кӱнчылам кава маныт. Залыште шинчыше-шамыч тиде диалект шомакым пален огытыл, садлан мутвундына эше ик мутлан пойдаралтын. Вес тунемшыже Нелли Сорокинанат шымлымашыже оҥай ыле. Тудо Марий Турек посёлкысо тоштерым ятыр ий вуйлатыше Вера Сорокина нерген порын каласкален. Нелли ӱмаштат тыгай шотан конкурсышто вийжым терген да кумшо верым налын.
Ты гана Марий политехнический техникумын студентше-влакын ушнымыштат куандарен. Нуно Кугу Отечественный сарыште кредалше кочашт нерген каласкаленыт.
Тений шымлымаш моткоч шуко лийын, сандене кок секций пашам ыштен. Иктыжым культурологий доктор Г.Шкалина ден поэт Г.Сабанцев вуйлатеныт, весыжым – Марий тӱвыра рӱдер директор Н.Пушкина, историй шанче кандидат Н.Попов, Марий Элын ончычсо Образований да воспитаний министрже Р.Катаева.
Жюрилан эн сайжым ойыраш куштылгыжак лийын огыл. Кажныжлан дипломым да пӧлекым кучыктеныт. Кумшо верым Советский район Ӱшнур школын тунемшыже А.Беляевалан («Еш альбомыш ончал» паша), Волжский район Памар школ гыч Е.Кудрявцевлан («Ешемын сугыньжо ден аралтышыже»), Звенигово лицей гыч Д.Кудрявцевлан («Кудрявцев ешын тукымвожшо»), Йошкар-Оласе 19-ше №-ан школ гыч Ю.Кузнецовалан («Авам могырым ешемын тукымвожшо») пуэныт. Кокымшо вер дене Медведево район Лӱльпан школ гыч Ю.Яндыганова (« Ковамын шондыкшо»), Марий Турек район Сардаял школын тунемшыже Ю.Ермолаева («Ковамын каваже»), Семёновко селасе 21-ше №-ан школ гыч Д.Симонов («Элнан историйыштыже – ешымын историйже»), Волжский район Шарача школ гыч Ю.Ямбашева ( «Николаевмыт ешын историйже») палемдалтыныт. Икымше верым Кужэҥер район Коҥганур школын тунемшыже А.Рыбакова («Кугезе ковамын шондыкшо»), Волжский район Шарача школ гыч А.Томцев («Ешемын эн шерге арверже») налыныт.
Л.ШАБДАРОВА.
М.Скобелевын фотожо
