5 сентябрьыште республик вуйлатышын пашажым шуктышо дене пырля Медведево районысо Краснооктябрьский поселкыш паша дене кайыме годым Руэм воктене шуйнышо кӱртньыгорнышто да воктен кундемыште транспорт прокуратур пашаеҥ-влакын кычалме пашам эртарымыштым ужна да умылышна: тыште ала-могай кугу туткар лийын.
Чынак улмаш: тиде кечын эрдене 4 шагатат пеле гутлаште кӱртньыгорно гоч эртыше корнышто тепловоз ден Hyundai машина тӱкненыт. Кызытеш пале: керылтмеке, тепловоз автомобильым эше пел километр наре шӱкен каен. Машинаште лийше кок пӧръеҥат – 66 ияш водитель ден 67 ияш пассажирже – пиалеш, илыше кодыныт, но чот сусыргеныт. Нуным эмлымверыш наҥгаеныт.
Ик шонымаш почеш, кудалмыж годым машинам виктарыше мален колтен. Лачшымак мо кузе лиймым кызыт шымлат да рашемдат.
Л.Камалетдинова.
