Килемар районысо «Раздолье» каныме базыште «Территория согласия» калык кокласе форум эртен.
Тудын дене кылдалтше проект «Реализация государственной политики» кугыжаныш программе почеш Калык-влакын пашашт шотышто федеральный агентствын федерал бюджет гыч ойырымо субсидийжылан конкурсышто сеҥышыш лектын. Форумым «Российысе марий-влакын федеральный калыкле-тӱвыра автномийышт» да республикысе Марий тӱвыра рӱдер Марий Элын Тӱвыра, савыктыш да калык паша шотышто министерствыжын полшымышт дене эртарен. Тушко республикысе калыкле-тӱвыра автономий, общине, тӱвыра рӱдер-влакын еҥышт, Межэтнический журналистике гильдий НКО-н медиакоммуникаций школжым тунем лекше, журналист-влак ушненыт.
Погынышо-влак калык кокласе кыл сфер дене кылдалтше йодыш-влакым каҥашеныт, паша опыт дене пайлалтыныт, поликультурный средан этнопсихологический ойыртемже шотышто эксперт-влак дене каҥашеныт, национальный политик сферыште эн сай практике дене палыме лийыныт, пырля этнокультурный проект-влакым шоненыт, тӱрло калык культурым палыме шотышто интеллектуальный модыш дене модыныт да икте-весе дене кылым ыштеныт. Эше пырля муреныт, куштеныт, каненыт манашат лиеш. Икманаш, пайдале да весела вашлиймаш эртен, вет тушко республикыште илыше 15 тӱрлӧ калыкын представительышт ушненыт. Тыгай форум калык коклаште келшымаш кылым чынже денак пенгыдемдаш полша, ӱшандарат участник-шамыч. Форумым почмаште Марий Эл правительстве председательын икымше алмаштышыже Михаил Васютин лийын.
С.НОСОВА
