МЕР КАҤАШ

Келшен ыштымаште — вий

Эртыше шуматкечын, 19 октябрьыште, Мер Каҥаш вуйверын черетан погынымашыже Марий Турек поселкышто лийын.

Мер паша дене кылдалтше мероприятийым верыш лектын эртарыме дене пайдаже кугурак. Тидым шотышко налын, Мер Каҥашын еҥже-влак эше лу ий ончычак тыгай йӧным илышыш пурташ тӱҥалыныт. Республикысе районлашке веле огыл, Татарстан, Пошкырт, Киров, Свердловск, Пермь кундемлашкат лектеденыт. Манмыла, эре Йошкар-Олаште гына погынымо дене верлаште чынже денак мо ышталтмылан чын акым пуаш неле. Адакше тыгай погынымашлаште марий мер актив гына огыл, а районым вуйлатыше, образований, культур сферла гыч специалист-влак палемдыме йодышым каҥашымашке ушнат да икойыш писынрак шуыт.

Марий Турекыште эртыше погынымашым оньыжа Э.Александров почо. Саламлыме мутым Марий Эл Правительстве председательын икымше алмаштышыже, вуйверын еҥже М.Васютин, Марий Турек муниципальный образованийым вуйлатыше Л.Яндыбаева, район администрацийым вуйлатышын пашажым шуктышо А.Зыков ойлышт.

Луымшо марий калык погынышто ты район гыч Мер Каҥашыш С.Конышевам сайленыт. Тудак пытартыш кум ият пеле жапыште шукталтше мер паша (лишыл жапыште газетыштына кумданрак ончыктена) нерген радамын каласкалыш. Тыгак Мер Каҥаш активын еҥже З.Батуева (марий мер пашаште ятыр ий тырша) тунемше-влакын академик В.Мосоловын илыме пӧртын пӱрымашыж нерген тургыжланен ойлымышт дене палдарыш. Озаже-влак тудым ужалаш шонат. Шийвундым муын налаш да ала тудым  тоштер-пӧртыш савыраш лиеш? Каҥашаш да иктешлымашым ыштышаш йодыш.

Луымшо погынын резолюцийже гыч образований дене кылдалтше йодыш кузе шукталтме нерген район администрацийын образований да самырык-влак шотышто пӧлкам вуйлатышын алмаштышыже О.Роженцова, культур дене Китне книгагудым вуйлатыше Г.Кибардина каласкалышт.

Марий Турек районысо «Ошмарий-Чимарий» юмыйӱла ушемын пашаж дене ты общиным вуйлатыше Г.Иванов (докладшым лишыл жапыште посна лудаш темлена) палдарыш.

Моло кундем дене таҥастарымаште Марий Турек районышто марий мер пашам кум организаций – Мер Каҥаш, «Ошмарий-Чимарий», Марий национальный конгресс —  икте-весе дене келшен пашам ыштат. Верысе кучем орган денат ик ойыш шуыт. Нунын паша йӧныштым молылан пример шотеш темлаш келшен толеш.

Вуйвер погынымаште оналмаш В.Мочаев вес ийын Марий Турек районысо марий самырык тукымын слётшым эртарен колтышаш йодышым тарватен. Оньыжа Латикымше марий калык погынлан ямдылалтме радам, погынын пашаче группылажын (тушко тӱрлӧ сфер гыч еҥ-влак пурталтыт) проектше дене палдарен.

Вуйверын да исполкомын еҥышт «Ошмарий-Чимарий» общинын этнорӱдерыштыже, «Кресаньык пӧрт» ден В.П.Мосолов лӱмеш краеведений тоштерлаште лийыныт.  «Арбор вел» фольклор ансамбль сылне концертше дене кумылым нӧлтен.

Светлана ПЕХМЕТОВА.

Снимкыште: вуверын погынымашыже – Марий Турекыште.

Авторын да Денис Речкинын фотошт

.

 

Опубликовать в Одноклассники

Добавить комментарий