Правительстве пӧртыштӧ Александр Евстифеевын вуйлатымыж почеш Марий Элын Кугыжаныш национальный политике концепцийжым илышыш пуртымо шотышто правительственный комиссийын заседанийже эртен.
Совещанийыште тиде кугыжаныш программын кодшо ийын кузе шукталтмыжым иктешленыт да тений ыштышашым палемденыт. Республикын тӱвыра, савыктыш да калык паша шотышто министрын алмаштышыже Галина Ширяева Россий Федерацийыште 2025 ий марте Кугыжаныш национальный политике стратегийым илышыш пуртымо шотышто мероприятий-влак план дене келшышын 2019 ийыште регионышто ыштыме паша дене палдарен. Ойлымыж почеш, кодшо ийын республикын правительствыже наций-влак кокласе кылым пеҥгыдемдаш полшышо 113 проект ден мероприятийым поддержатлен.
Заседанийыште тыгак республикысе муниципал образований администраций-влак пеленысе калык-влакын пашашт шотышто советыштын пашашт нерген мутланеныт. Ты гана Советский муниципал район администраций вуйлатыше Антон Трудинов ден У Торъял муниципал район администраций вуйлатыше Василий Блинов конфессий ден калык-влак коклаште умылыдымаш ден ӱчашымаш тарваныме ваштареш могай профилактике мероприятий-влак эртаралтме нерген каласкаленыт.
Марий Эл вуйлатыше заседанийыште каҥашыме йодыш-влаклан умбакыжат кугу тӱткышым ойыраш да мер организаций, самырык-шамыч дене кылым ыштен пашам шуяш темлен.
Марий Эл вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен
