Пошкырт кундем Бирск районысо «Канде кава» группылан февраль тылзыште 20 ий темеш. Кызыт тиде группышто Сергей Байназов, Сергей Зайнитдинов, Римма Исламгалиева, Татьяна Каликаева мурат. Вуйлатышыже — Сергей Байназов, группышто икымше кече гычак шотлалтеш. Тудо автор-исполнитель семын палыме, нылле утла мурыжо уло.
Утларакшым Пошкырт кугыжаныш университетын студентше-влак дене пашам ыштат. Коло ий жапыште тиде группо гоч 17-18 студент эртен. Талук еда 100 утла концертым пуат. Пошкырт кундемысе марий яллаште концертым ончыктымо деч посна Одо, Татарстан, Свердловск, Пермь кундемлаш, Нижневартовск, Сургут, Москва, Санкт-Петербург олалаш да Эстонийыш миен коштыныт.
Сергей Зайнитдинов мурымо деч посна звукооператор семынат тырша. Тӱвыра аланыште тудо 26 ий пашам ышта. 11 классым тунем пытарымеке, вигак клубыш художественный вуйлатышылан пашам ышташ пурен. Шым ий Нефтекамск филармонийыште ыштен, вара угыч шочмо кундемыш пӧртылын. Сергей кандаш ияшак гармонь дене шокташ тунемын. Ешыштыже шукын музыкылан шӱман лийыныт: кочаже, акаже-влак. «Кунам ме еш дене чумыргена, куштышо да мурышо ансамбль погына», — воштылеш Сергей.
Акаже-влак мураш-кушташ моткоч уста улыт, нимогай магнитофон, музыкальный центр огеш кӱл. Шке гыч лукмо йӱк веле. Сергей кызытат шарна, кокымшо классыште тунеммыж годым ачаже тудлан баяным пӧлеклен. Тиде баян ден ондак Сергейын Марина акаже шокташ тӱҥалын, вара Сергей ушнен. Икмыняр жап гыч Марина шоктымыжым кудалтен, а Сергей тиде пашам умбакыже шуен. 2014 ийыште Мишкан районышто эртаралтше «Яндар йӱк» фестивальыште икымше гана солист семын сценыш лектын. Ончыч ялыште мурен, кугу сценыш лектын огыл. «Ондак кугу сценыш лекташ лӱдынам, мурен ом керт манын шоненам. Тиде фестивальыште дипломым кучыктышт да шкем аклаш тӱҥальым», — каласкала Сергей.
«Салам» мурын авторжылан «Салам» шоктыш. Тыге Сергей Байназов дене палыме лийыныт. Зайнитдинов Байназовым кугу изажлан, кураторжылан шотла.
Концертым эртарыме деч вара «Канде кава» группо калыкым эре марла куштыктен кода, тиде традицийыш савырнен. Сергей Байназов утларакшым тальянке дене шокта, южгунам — шиялтышым, Сергей Зайнитдинов тыгак баяным, шиялтышым, тальянкым шокта, коклан гитарымат кидыш налеш.
Костюмым Марий Эл Республикысе «Сайвер» рӱдерыште заказатлат. Марий Элысе мурызо-влак дене пеҥгыде кылым кучат. Мемнан артист-влак Пошкырт кундемыш мийымышт годым концертым виктарен колташ полшат. А кунам Пошкырт кундем гыч толыт, мемнан-шамыч полыш кидым шуялтат.
Сергей Байназов почеламутлашке семым пышта. «Кокланже нелылыкат лектеш, вет поэт литературлан келшышын воза. Лудмо годым почеламут пеш моторын йоҥга, семым пышташ тӱҥалат — йӧсырак. Садлан кажне почеламутым мурышко савыраш ок лий», — манеш солист.
20 ноябрь гыч Марий Эл Республикыш «Канде кава» концерт дене толеш.
20 ноябрь – Звенигово район, Красногорский посёлко, 18 шагатлан.
21 ноябрь – Шернур посёлко, 18 шагатлан.
22 ноябрь – Кужэҥер посёлко, 19 шагатлан.
23 ноябрь – Марий Турек посёлко, 19 шагатлан.
24 ноябрь – Йошкар-Оласе Марий самырык театр, 16 шагатлан. Концерт программым Роза Искакова ден Вадим Краснов сылне мурышт дене пойдарат.
Е.Ёлкина
М.Скобелевын фотожо.
