САМЫРЫК ТУКЫМ

Калык нерген шонаш кӱлеш

17 февральыште Морко тӱвыра полатыште «Самырык тукымын мер пашаште верже» йыргешке ӱстел йыр школ, йочасад, книгагудо, черке пашаеҥ-влак чумыргеныт. Тыгак ты мероприятийыш Марий Эл Республик Кугыжаныш Погын председательын алмаштышыже, МАРНИИЯЛИ-н директоржо Евгений Кузьмин, Марий книга савыктыш директор Юрий Соловьёв, Марий калык конгресс председатель, «Кугарня» газет» ГУКП директор Эдуард Иманаев, «Ямде лий» газетын тӱҥ редакторжо Людмила Григорьева да мый, «Марий Эл» газет пашаеҥ – Оля Мошкина, ушнымо. Мутланымашым «Мер Каҥаш» вуйверын еҥже, «Морко мланде» газетын тӱҥ редакторжо Анатолий Титов вӱден.

Районышто самырык-влак шкештым чулымын кучат. Мутлан, марий йылмым, сылнымутым, ИКН-ым туныктышо-влакын методике пӧлка вуйлатыше, Шӱргыял школышто тыршыше Елена Григорьева «Дом без одиночества» проектым  вӱда. Тудын вуйлатымыж почеш «Рвезе тукым» йоча ушемын участникше-влак ялысе илалше-влак деке коштыт. Кертмышт семын нунылан мӧҥгысӧ сомылым шукташ  полшат. Пайрем кечын саламлаш мият, пӧлекым ямдылат.

Кужер школышто тӱҥалтыш классыште туныктышо самырык рвезе Максим Алгайкинат сай примерым ончыкта. Тудо экологий могырым пашам виктара. Тунемшыже-влакым йырвелым арун кучаш кумылаҥда. Ыштымыжым ужын, верысе калыкат пӱртӱс эрыктымашке ушнаш тӱҥалын.

Моло аланыште тыршыше-влакат шке пашаштым радамлен ончыктеныт. «Кызыт «Марий улам – марла лудам» акцийым эртарена. Книгагудын унаже-влак деч марла лудаш йодына. Тидым видеош возен социал лаштыкышкына вераҥдена.  Ялласе филиална-влакат тыгак ыштат», – палдарен рӱдӧ книгагудо системе вуйлатыше Маргарита Семёнова.

Молодёжный парламентын еҥже Элла Ефимова проект пашаш ушнаш темлен: «Грант полышым пуышо организаций-влак шуко конкурсым эртарат. Проектым илышыш шыҥдарашлан шийвундым кажныже сеҥен налын кертеш. Тӱҥжӧ – ӧрканаш огыл».

Мероприятийыш «Газпром Трансгаз Нижний Новгород» организацийын Моркысо филиалыштыже тыршыше рвезе Геннадий Полатов ушнен ыле. Тудо самырык-влак дене пашам ыштымаште вуйын шога. Тӱрлӧ мероприятийыш лектын коштеш. Мутлан, 2017 ийыште эртыше «Унчо-fest» фестивальыште, икмыняр гана Марий самырык тукым слётышто  лийын. Шкежат шагал огыл мероприятийым организоватла.

Меат, журналист-шамыч, шке пашанам ончыктенна. Самырык-влак нерген увер газетлаште чӱчкыдын лектеш.  Школ-влак денат кылна уло. Тудыжо эшеат пеҥгыде лийже манын, юнкор кружок-влакым ышташ гын, сайрак ыле.

«Ме чылан сайын илынена: тамлын кочнена, моторын чийынена. Туге гынат окса тӱҥ задачына лийшаш огыл. Мер илышыштат чолга лийман, шке калык нергенат шоныман. Йылмына вияҥже манын, марла газетым, книгам лудман, тидлан йоча-влакымат кумылаҥдена гын, чылалан пайда лиеш», – мучашлен Э.Иманаев.

 

О.МОШКИНА

Опубликовать в Одноклассники

Добавить комментарий