Калыкын икоян кечыже да Марий автономийын 99 ияш лӱмгечыж вашеш Т.Евсеев лӱмеш калыкле тоштерыште кастене «Марий мландына калыкше дене виян» ончер почылтын.
Молан лачшымак кастене йодыда? Ты ончер «Сымыктыш йӱд» всероссийский тӱвыра акцийланат келыштаралтын ыле. Тачысе кечылан республикыштына 680 380 еҥ ила. Пытартыш перепись почеш, лачшымак 110 наре тӱрлӧ калык. Тышеч 52 национальностьшо кажныже 10 тӱжем деч утларакын улыт. Сандене ончерыште тӱрлӧ калыкын национальный вургемжым, сылнештаршыжым, илышыште кучылталтше арвержым, ыштыш-кучышыжым ужаш йӧн уло. Марий, руш, татар, башкир, чуваш-влакыным… Тоштерын фондшо гыч XIX курым мучаш гыч XXI курым тӱҥалтыш ийласе фотодокументальный материал-влакат ончыкталтыт. А нунышт гоч ме тӱрлӧ калыкын чиемже тачысе кече марте кузе вашталт толмым эскерен кертына.
С.НОСОВА
Снимкылаште: ончер почылтын.
