У ий вашеш марий йӱла почеш йоча-влаклан пайремым эртарыше-влакым муаш лиеш мо?
А.Севрюгина.
Йошкар-Ола.
У ийлан пӧлеклалтше пайрем-влакым марий театр-влак эртарат. А теве «Матур» ООО У ий вашеш Йошкар-Ола воктенысе Ким ялыште «Уна кудымат» почеш. Йоча-влаклан лӱмын «Марий У ий «Уна кудо» этнопӧртышто» программым ямдылен. Толшо-влакым Кудо-Водыж марий калыкын йӱлаже почеш вашлиеш. Вара Йӱштӧ Кугыза ден Лӱмӱдыр нуным тӱрлӧ семын модыкташ да веселитлаш тӱҥалыт. Пырля марий мурым, куштымашым тунемыт. У ий кож йыр пӧрдын ситарымеке, шудым оптыман мешак дене курык мунчалташ каят. Яндар южым шӱлалтен пурымо деч вара чылан пырля, шере сийым пурлалын, шудо чайым йӱыт. Вара, кумыл лиеш гын, мелнам кӱэшташ але у ий модышым ышташ туныктымо мастер-класс эртаралтеш. Икманаш, пайрем годым йоча-влак марий калыкын йӱлаж гыч шуко уым пален налыт.
С.Носова
