Ковролин ситен огыл
Пӧрткӧргым олмыкташ тӱҥалыннат, Йошкар-Оласе ик кевытыште 120 кв.м ковролинлан заказым ыштышым. Тудым икмыняр кече гыч кондышт, но 100 кв. м гына. «Кевытыштына тыгай тӱсан ковролин тетла уке, лишыл жапыштат огыт кондо», – мане продавец да ситыдыме ковролинлан оксам пӧртылташ темлыш.
Мыланем тиде ыш келше: кондымо ковролин деч шӧрлен, ончылгоч тӱлымӧ оксам пӧртылташ йодым. «Метраж дене ужалыме сатум ны весе дене вашталташ, ны пӧртылташ огеш лий», – лие вашмут. Тиде случайыште кӧ чын: продавец але мый?
Г.Скворцова.
Звенигово район.
Йодышлан Роспотребнадзор виктемын пресс-службыжым вуйлатыше Е.Желонкина вашешта:
– Потребительын праважым аралыме нерген закон дене келшышын, продавец тыланда ойпидышыште ончыктымо качестван сатум пуышаш ыле. Тендан случайыште тудо ойпидышын сату чотшо нерген условийжым шуктен огыл. Законланак келшышын, продавец ойпидышыште ончыктымо наре сатум пуэн огыл гын, те ситыдыме сатум ешарыктен але улшо сатуж деч шӧрлен, отказен кертыда. Сатулан оксам тӱлымӧ гын, тудым пӧртылташ правада уло.
Метраж дене ужалыме ковролин пӧртылташ да весе дене вашталташ лийдыме сатулан шотлалтеш гынат, тендан случайыште кондымо сату деч шӧрлаш,отказаш, тӱлымӧ оксам пӧртылташ лиеш.
М.ИВАНОВА.
