Пошкудем шуко шочшан, инвалид йочан ава-влак пенсийыш жап деч ончыч лектын кертыт манеш. Чынак мо?
Е.Ильина.
Волжский район.
Йодышлан Россий Пенсий фондын Марий Элысе пӧлкажын пресс-службыштыжо тыге вашештышт:
– Чын. Вич да тылеч шуко йочам ыштыше, нуным кандаш ий марте воспитатлыше ӱдырамаш-влак пенсийыш 50 ияш лектын кертыт. Но тидлан 15 ий паша стаж да 30 балл кӱлыт.
Инвалид йочам кандаш ий марте воспитатлыше, 30 баллым погышо ава ден ача-влакат пенсийыш жап деч ончыч, 50 да 55 ияш, лекташ праван улыт. Тыгодым ӱдырамашын 15 ий паша стажше лийшаш, пӧръеҥын – 20 ий. Пенсийым ача-ава кокла гыч иктыже оформитлен кертеш.
Жап деч ончычсо пенсийым налше ава 55 ийым але ача 60 ийым темат гын, шоҥгылык шотышто пенсийым оформитлен кертыт. Тыгодым пенсий ийготыш шудымо пелаш жап деч ончычсо пенсийлан йодмашым пуаш праван.
М.ИВАНОВА.
