Тӱшка паян собственностьышто улшо мландым кок посна участкылан пайлынена. Тыгай годым межа планым кажне участкылан ыштыктыман мо? Икте-весе коклаште мландым пайлыме шотышто кутырен келшыме нерген кагаз (соглашений) кӱлеш мо?
И.Павлова.
Волжский район.
Йодышлан Росреестрын Марий Элысе виктемжын пресс-службыжо вашешта:
– Россий Минэкономразвитийын 2015 ий 8 майыште лукмо 921-ше №-ан кӱштымашыж дене пеҥгыдемдыме Межа планым ямдылыме йодмаш-влакын 20-шо пунктшо дене келшышын, ик мланде участкым икмынярлан пайлыме годым межа план ик документ семын ышталтеш. Икманаш, тендан случайыште ик межа планым ыштыктыман.
Тылеч посна, Россий Федераций Мланде кодексын 11.2 статьяжын 5-ше пунктшо дене келшышын, частный собственностьышто улшо да икмыняр собственникан мланде участкым озаже-влак дене кутырен келшен гына пайлаш лиеш.
2015 ий 13 июльышто пеҥгыдемдыме 218-ФЗ №-ан «Кусараш лийдыме погын кугыжаныш регистрацийже нерген» федеральный законын 41-ше статьяжын 8-ше ужашыжын 3-шо пунктшо дене келшышын, кусараш лийдыме объектым пайлыме нерген кутырен келшымаш (соглашений) – кугыжаныш кадастр учётым ыштыкташ да пайлыме объект-влаклан правам кугыжаныш велым регистрироватлаш негыз.
Тидын дене келшышын, мландым пайлыме нерген кутырен келшымаш обязательный документлан шотлалтеш.
М.ИВАНОВА.
